Berlin, 14 mars - Sipas një sondazhi të botuar të premten më shumë se gjysma e gjermanëve mendojnë se Greqia duhet të largohet nga zona euro.

Një sondazh i ”Politbarometer”, i kryer për llogaritë televizionit publik gjerman, ZDF, tregoi se 52 për qind e gjermanëve mendonin se vendi ballkanik duhej të largohej nga eurozona, ndërkohë që 40 për qind e tyre mendonin të kundërtën.

Vetëm për dy javë, opinioni publik gjerman ndryshoi në favor të një “Grexit”.

Vlen të përmendet fakti se 80 për qind e gjermanëve mendonin se qeveria e kryeministrit grek, Aleksis Cipras nuk ishte e sinqertë me partnerët e saj evropianë.

Edhe ministri gjerman i Financave, Wolfgang Schaeuble, nuk përjashton një dalje të Greqisë nga zona euro.

“Që nga momenti që përgjegjësia për të vendosur është vetëm e Greqisë, dhe ne nuk e dimë se çfarë ajo mendon të bëjë, nuk mund të përjashtojmë një dalje të Athinës nga zona euro”, deklaroi dje në mbrëmje Schauble në një intervistë për televizionin austriak ORF.