Gjakovë, 21 shtator - Sot ka përfunduar fushata e Debateve Publike lidhur me projekt buxhetin financiar për vitin 2016, të cilin e ka organizuar Komuna e Gjakovës në mbështetje nga Zyra e OSBE-së në Gjakovë.

Fillimisht janë mbajtur debate në qendra rurale të komunës së Gjakovës, në Botush, Cermjan, Skivjan, Bishatzhin dhe në Demjan.

Ndërsa sot u mbajt debati i fundit në sallën e kuvendit të komunës, ku morën pjesë një numër i konsiderueshëm i qytetarëve së bashku me përfaqësues të Komunës së Gjakovës.

Fillimisht drejtori i Drejtorisë për Buxhet dhe Financa, Teki Shala, ka numëruar projektet që janë paraparë të implementohen në vitin e ardhshëm dhe ka bërë të ditur se Komuna e Gjakovës në vitin 2016 do të ketë 19 milion e 895 euro buxhet komunal.

Sipas Shalës, ganti i përgjithshëm do të jetë afro 7 milion euro, ganti specifik i arsimit do të jetë 7 milion e 710 mijë euro, ose 400 mijë euro më pak se vitin e kaluar për shkak të numrit më të vogël të nxënësve në këtë vitit shkollor.

Sa i përket gandit specifik për shëndetësi ai do të jetë 2 milion e 235 mijë euro, ndërsa të hyrat vetjake komunale parashihen të jenë 3 milion e 30 mijë euro.

Gjatë vitit 2016 pagat dhe mëditjet do të arrijnë shumën mbi 13 milion euro, mallrat dhe shërbimet 1 milion e 695 mijë euro, shpenzimet komunale mbi 561 mijë euro, subvencionet dhe transferet 439 mijë e 982 euro, ndërsa shpenzimet në projekte kapitale do të jenë 4 milion e 191 mijë e 127 euro.

“Ky është projekti buxhetor që ka hartuar komuna, ndërsa përmes sugjerimeve vërejtjeve dhe plotësimeve të juaj, ekziston mundësia që të ketë ndryshime “, ka shtuar Shala në këtë debat publik.

Qytetarët kanë dhënë vlerësime të mira lidhur me ndarjen e shumës së buxhetit në lokacione përkatëse.

Por, sipas tyre është e domosdoshme që në disa lokalitete që kërkohen urgjentisht investime, komuna të lartëson prioritetin e saj si në fshatin Nivokaz, në ndërtimin e kanaleve për ujitje, kanalizim, ujësjellësin dhe ndërtimin e infrastrukturës rrugore në fshatrat e Lugut të Carragojës.

Poashtu, ka pasë kërkesa për ndërtimin e rrjetit të ujësjellësit dhe kanalizimit në fshatrat e Rekës së Keqe, në pjesën dërmuese të fshatrave të Dushkajës dhe Hasit.

Për këtë kërkesë Shkumbin Kastrati, drejtor i Shërbimeve Publike ka thënë se sa i përket rrjetit të ujësjellësit, Komuna e Gjakovës me mbështetje të shtetit Zviceran do të investoj në afro 40 fshatra të komunës dhe brenda dy viteve asnjë fshat i Gjakovës nuk do të mbetet jashtë rrjetit të ujësjellësit.

 Sqarime për investime në projekte përkatëse ka dhënë edhe Kryesuesi Luan Gola, drejtoret  Bekim Ermeni, Basri Komoni, Teki Shala e drejtor tjerë prezent në këtë debat.