Prishtinë, 24 nëntor - Përfaqësues të Drejtorisë Rajonale për Punësim të Ministrisë së Punës dhe Mirëqenies Sociale të Republikës së Kosovës, të Qeverisë Komunale të Gjakovës, dhe të Organizatës  Gjermane “GIZ” sot në sallën e madhe të Komunës së Gjakovës,  kanë organizuar debat me temën “Vlerësimi i nevojave lokale për punësim në Gjakovë”.

Në këtë tubim është prezantuar raporti i komisionit nga “GIZ” që ofron informacione  mbi sektorin e rinisë, sektorin privat dhe strukturat e punësimit në Gjakovë.

Fillimisht drejtori i Drejtorisë dhe Administratës së Përgjithshëm dhe Personelit në Komunën e Gjakovës, Armend Vokshi, ka falënderuar përfaqësuesit e Organizatës “GIZ” lidhur me këtë projekt që ka të bëjë me përkrahjen e mekanizmit  për bashkëpunim në mes  të akterëve  në fushën e punësimit, sektorit të rinisë dhe komunitetit të biznesit në Gjakovë.

“Komuna e Gjakovës ka për objektiv dhe mision të vetin  përkrahjen e punësimit të rinjve dhe në këtë rast vlerësojmë lartë angazhimin e të gjithë akterëve që kanë punuar  në këtë projekt, dhe se Komuna e Gjakovës është mbështetës i fuqishëm i kësaj fushe”, ka thënë drejtori Armend Vokshi.  
 
Për të arriturat dhe objektivat e këtij projekti ka raportuar znj. Emily Collom, udhëheqëse e projektit “YEPiK”.

“Raporti komisionarë nga “GIZ” ofron një analizë  dhe vlerësim të gjendjes  aktuale  të nevojave të sektorit të rinisë dhe të atij privat në Gjakovë, me qëllim të rritjes së mëtejshme  të promovimit  të punësimit në Kosovë”, ka thënë znj. Collom.

Ajo ka shtuar se studimi ynë në këtë fushë  ka paraqitur në pah sfidat  kryesore me të cilat ballafaqohen të rinjtë që kërkojnë punë, si dhe në kuptimin e sfidave të sektorit privat gjatë punësimit të punëtorëve të rinj.

Në ndërkohë znj. Vjosa Mullatahiri, nga projekti “ YEPiK”, ka prezantuar të gjeturat nga Raporti i Vlerësimit të Nevojave  për punësimin e të rinjve.

Ajo ka thënë se 48% e të rinjve marrin informacione për punësim nëpërmjet rrjeteve sociale, pastaj 80 % e të rinjve kanë deklaruar se nuk përfitojnë nga Zyra për Punësim  dhe nuk janë të regjistruar, ndërkohë që 53% kanë deklaruar se po përfitojnë  nga programet e aftësimit në QAP, dhe 48% janë të interesuar të ndjekin trajnimet profesionale e kështu me radhë.

Në këtë debat është prezantuar  edhe puna në grupe për hapat e ardhshëm që duhet ndërmarrë, siç është identifikimi i tri intervenimeve kryesore që mund të mobilizojnë  të rinjtë në komunën tonë dhe promovojnë punësimin e tyre, pastaj duhet të definohen akterët  përgjegjës për rolin e tyre për secilin rast të punësimit.