Drenas, 14 korrik - Në prag të Festës së Fitër Bajramit, NewCo Ferronikeli në bashkëpunim me Komunën e Drenasit ndihmojnë rreth 100 familje të këtij rajoni me pako ushqimore.

Këto ndihma u ndanë  për familjet me gjendje të rëndë sociale si dhe për gratë e dhunuara gjatë luftës.

Përfaqësuesit e NewCo Ferronikelit, në këtë rast e shfrytëzuan rastin që të gjithë të pranishmëve e po ashtu besimtarëve të fesë myslimane t’ju urojnë festën e Fitër Barjamit.

“Me shpresë që këto pako me ushqim do ta begatojnë sado pak tryezën tuaj urojmë që të kaloni një Festë të këndshme. Besojmë që përkushtimi ynë ndaj jush tanimë është dëshmuar vite me radhë dhe zotohemi që edhe në të ardhmen do t’ju dalim në ndihmë.\"

\"Fytyrat e juaja të hareshme që po i shohim sot janë vërtet kënaqësi për neve që sadopak po jua bëjmë këtë festë më të lumtur”, tha Drejtori i Përgjithshëm i NewCo Ferronikelit z. Kostas Rizopoulos.

Ndërkaq drejtori për Shëndetësi dhe Mirëqenie Sociale në Komunën e Drenasit, Ilir Shala falënderoi NewCo Ferronikelin që sipas tij çdo vit po ju del në ndihmë komunitetit të Drenasit në forma të ndryshme.

Z. Shala tha se “Falënderojmë NewCo Ferronikelin e në veçanti menaxhmentin e ndërmarrjes të cilët po shprehin solidaritet me rastin e Festës së Fitër Bajramit. Ky aktivitet i sotshëm është vazhdimësi e bashkëpunimit të mirë që Komuna e Drenasit ka krijuar me Ndërmarrjen NewCo Ferronikeli”

Një falënderim tjetër në këtë aktivitet erdhi nga znj. Kadire Tahiraj, Përfaqësuese e Qendrës për Promovimin e të Drejtave të Grave, e cila ndër tjerash tha “Ne kemi një falënderim të veçantë ndaj NewCo Ferronikelit që po kontribuon për këtë kategori të ndjeshme, qe jeton në kushte të vështira por e cila asnjëherë nuk ka pasur guxim të kërkoj ndihmë për shkak të identitetit të tyre të fshehur”

Ishin të shumta familjet që prisnin në radhë për marrjen e ndihmave të cilët ishin falënderues ndaj Ndërmarrjes NewCo Ferronikelit dhe Komunën e Drenasit.

Shpërndarja e pakove ushqimore dhe ndihmat për këtë komunitet për Ndërmarrjen NewCo Ferronikelin janë vazhdimësi e aktiviteteve për  bamirësi që nga 2007. Për më tepër NewCo Ferronikeli zotohet se këtë aktivitet do ta vazhdoj edhe në të ardhmen.