Prishtinë, 15 qershor - Nën organizimin e Odës Ekonomike Amerikane në Kosovë, një grup prej 50 fëmijësh të SOS fshatrave të Kosovës vizituan kompaninë kosovare Devolli Corporation, ku patën mundësinë që të shohin dhe të njihen me procesin e prodhimit të kafesë, dyshekëve dhe sfungjerit.

Në kuadër të vizitës në fabrikë, ishte përgatitur edhe ushqimi për të gjithë vizitorët, ku pastaj vazhdoi vizita e paraparë tek ujëvara e Drinit të Bardhë.

Përfaqësuesit e Devolli Corporation krahas falënderimit për vizitën, gjithashtu shprehën gatishmërinë që edhe më tutje të vazhdojnë bashkëpunimin dhe kontributin e tyre në organizimet e tjera.

Drejtuesit e SOS fshatrave u shprehën mirënjohës për mikpritjen që kompania Devolli Corporation u bëri fëmijëve të SOS Fshatrave, dhe njëkohësisht shprehën mirënjohjen e tyre ndaj Odës Ekonomike Amerikane për organizimin e kësaj vizite.

Në anën tjetër, zyrtarët e Odës Amerikane u zotuan se pas kësaj vizite, por edhe pas pjesëmarrjes në projektin e mëhershëm të mbledhjes së fondeve të organizuar bashkë me kompaninë Coca Cola dhe me Rrjetin e Përgjegjësisë Sociale Korporative të Kosovës, ata do të vazhdojnë mbështetjen e tyre për SOS Fshatrat në forma të ndryshme.

Përveç mundësisë për të mësuar shumë gjëra të reja, fëmijët e SOS Fshatrave patën mundësinë që të socializohen me punonjësit e Devolli Corporation si dhe me stafin e Odës Ekonomike Amerikane që ishte edhe qëllimi kryesor i këtij organizimi.

Poashtu, Devolli Corporation kishte përgatitur edhe dhurata të shumta për ta, të cilat u pritën me shumë entuziazëm nga fëmijët.