Frankfurt, 1 tetor - Presidentja e Bankës Qendrore Evropiane (BQE), Christine Lagarde ka thënë se ekonomia e bllokut ishte kthyer nga buzë gremina, por se nuk ka dalë plotësisht nga kriza pas pasojave të shkaktuara nga shpërthimi i COVID-19.

Duke folur në Forumin e BQE-së të vitit 2021, të mbajtur të mërkurën mbrëma përmes video-konferencës, Lagarde tha se ekonomia po rimëkëmbej me shpejtësi dhe do të arrinte nivelet para pandemisë deri në fund të vitit.

Pas një recesioni shumë të pazakontë, tha ajo, Eurozona po kalonte një rimëkëmbje të ngjashme atipike.

Ajo theksoi se pasiguritë që kërcënojnë rritjen ende vazhdojnë dhe shtoi se kishte pasur ngecje dhe ndërprerje të zinxhirit të furnizimit gjatë disa muajve të fundit.

Duke vënë në dukje se ngecjet e tjera ishin në "radarin" e bankës, Lagarde tha se shkurtimet në fjalë kishin ngadalësuar eksportet e shumë vendeve anëtare të BE-së.

"Ndërsa rimëkëmbja e fuqishme po mbështet trendet e inflacionit, ajo që ne po shohim tani është kryesisht një fazë e inflacionit të përkohshëm të lidhur me rihapjen. Ndryshimet strukturore mund të krijojnë presione rritëse dhe rënëse mbi çmimet", tha shefja e BQE-së.