Prishtinë, 18 dhjetor - Dogana e Kosovës dhe Administrata Tatimore e Kosovës (ATK), dy javë para vitit të ri kalendarik, janë afër arritjes së planit.

Zëdhënësi i Doganë së Kosovës, Adriatik Stavileci, ka bërë të ditur se sipas të dhënave të fundit dogana ka mbledhur 790 milion euro apo shprehur në përqindje është 90 për qind e planifikimit.

“Nëse krahasohet me vitin e kaluar dogana ka tejkaluar vitin 2011 për 1.5 për qind apo shprehur në të hyra kjo është për mbi 10 milion euro”, ka theksuar ai.

Kurse Valentina Bytyqi – Sefa, zyrtare për Komunikim me Publikun, në Administratën Tatimore e Kosovës(ATK), ka deklaruar se ATK edhe gjatë këtij viti ka qenë e përkushtuar në trajtimin e barabartë të tatimpaguesve, njëkohësisht duke ju ofruar lehtësira në përmbushjen e obligimeve tatimore, përmes projekteve si Deklarimi Elektronik-EDI, Qendra e Thirrjeve dhe sistemi i integruar i regjistrimit te bizneseve One Stop Shop, të cilat janë duke treguar rezultat mjaft të mira në raport me tatimpaguesit.

“Të hyrat e realizuara gjatë periudhës janar-nëntor 2012,  janë  në vlerë prej  257.6 milionë euro”, ka theksuar ajo.

Sipas saj nëse e krahasojmë  periudhën Janar-Nëntor 2012,  me të njëjtën periudhë të vitit të kaluar, të hyrat në këtë periudhë janë më të larta  për  7 për qind ose shprehur në vlerë 16.8 milionë euro.

“Trendi i tanishëm i realizimit të hyrave deri në fund të këtij viti do të vazhdoi me një  përmirësim të rritjes së të hyrave, kurse projeksioni i  paraparë për vitin 2012”, ka theksuar ajo.

/epoka e re/