BSPK protestoi për të drejtat e punëtorëve
Rreth 200 punëtorë kosovarë protestuan sot në Prishtinë për kushte më të mira të punës në sektorin publik e privat.
Këto protesta sipas BSPK-së vijnë për shkak të gjendjes aktuale dhe shqetësimeve te grumbulluara lidhur me të drejtat që u takojnë punëtorisë kosovare.
BSPK nëpërmjet kësaj proteste ka kërkuar zbatimin e ligjeve për të drejtat e punëtorëve në praktikë, nënshkrimin e marrëveshjes kolektive, zbatimin e marrëveshjes për pagën minimale prej 220 euro, miratimin e ligjit për pensionistët, pranimin e stazhit të punës për vitet 1990-1999, krijimin e fondit social për punëtorët dhe funksionimin e Odës së Veçantë të Gjykatës Supreme për 20% nga privatizimi i ndërmarrjeve.
Rreth 200 punëtorë kosovarë protestuan sot në Prishtinë për kushte më të mira të punës në sektorin publik e privat.
Naxhije Salihu punoi në Kombinatin e Tekstilit plot 32 vite. Salihu iu bashkëngjit protestës siç tha ajo për të kërkuar statusin e pensionistes. “Prej të 90-ve nuk jam tu punu ma, shetitna rrugëve, shkoj për ndihma sociale ”, tha ndër tjerash ajo.
Shaip Qorri, punëtor i ''Ferronikelit'' përmes protestës ngriti zërin për marrjen e 20 përqindëshit nga procesi i shitjes.
Ndërsa, kreu i Bashkimit të Sindikatave të Pavarura të Kosovës, Haxhi Arifi tha se protesta erdhi pasi kërkesat e punëtorëve nuk u realizuan përmes dialogut me Qeverinë siç ishte pritur.
“ Të gjitha kërkesat tona mbetën në sirtarin e Qeverisë. Kërkesat tona janë të realizueshme sepse ne nuk kemi kërkuar diçka që nuk mund të realizohet”, tha Arifi.
Kreu i BSPK-së, Haxhi Arifi, tha se “nëse kërkesat nuk përmbushën, BSPK-ja do të merr hapat, të cilët deri më ma tash nuk i ka ndërmarrë”.
"Kërkojmë miratimin e ligjit për pensionistët, kërkojmë pranimin e stazhit të punës për vitet 1990 – 1999, kërkojmë krijimin e fondit social për punëtorët, që privatizimi i la papunë si dhe kërkojmë funksionimin e Odës së Veçantë të Gjykatës Supreme për 20 për qind nga privatizimi i ndërmarrjeve”.
