Washington, 18 qershor - Zëdhënësi i Fondit Monetar Ndërkombëtar (FMN), Gerry Rice, deklaroi të enjten vonë se largimi i Britanisë së Madhe (Brexit) nga Bashkimi Evropian (BE) mund të shkaktojë në terma afatgjata paqartësi, lëkundje financiare dhe rritje të ngadaltë.

Gerry Rice vlerësoi zhvillimet, që mund të pasojnë referendumin e 23 qershorit në Britaninë e Madhe, në rast se ai rezulton me Brexit, gjatë një konference shtypi në ambientet e selisë së FMN-së në Uashington.

“Fondi Monetar Ndëkombëtar respekton zgjedhjen e britanikëve dhe nuk ka për qëllim t’i bjerë ‘ziles së alarmit’. Por një ndër detyrat e FMN-së është vlerësimi i rezultateve të mundshme ekonomike”, theksoi ndër të tjera zëdhënësi Rice.

Në raportin e mëparshëm të saj mbi perspektivën ekonomike botërore, FMN-ja paralajmëronte se dalja e Britanisë së Madhe nga Bashkimi Evropian mund të shkaktojë “dëme të rënda rajonale dhe globale”.

“I ashtuquajturi ‘Brexit’ do të prishë marrëdhëniet tregtare të vendosura deri më sot dhe do të shkaktojë ‘sfida të mëdha’ për të dyja palët, Mbretërinë e Bashkuar dhe pjesën tjetër të Evropës”, theksohej në atë raport.

FMN-ja gjithashtu nënvizonte se referendumi kishte krijuar që tani pasiguri për investitorët dhe një votë pro daljes së Britanisë së Madhe nga BE-ja vetëm sa do ta thellonte këtë.