Besnik Beka, drejtor i ri i Drejtorisë së Prokurimit në Mitrovicë
Emërimi është bërë pasi që drejtori i deritashëm i kësaj drejtorie, Gani Mustafa, ka kërkuar nga kryetari Bahtiri, për shkaqe personale, që të lirohet nga pozita e drejtorit të Drejtorisë së Prokurimit.
Beka është i lindur më 08.02.1987, në Mitrovicë, ku ka kryer shkollën e mesme-Gjimnazin “Frang Bardhi”. Në vitin 2006 ka filluar studimet universitare pranë Universitetit Publik të Prishtinës, të cilat i ka përfunduar në afat të rregullt, në vitin 2009, me notën mesatare 9.92. Si njëri nga studentët më të mirë, ishte shpërblye me çmimin “Student i dalluar i Universitetit të Prishtinës”.
Në vitin 2010 ka regjistruar studimet për master, ku i ka dhënë të gjitha provimet, me notë të shkëlqyeshme dhe pritet që së shpejti të mbroj edhe temën e diplomës.
Ai nga viti 2010 ka punuar si kontabilist në kompani të ndryshme, ku është treguar po ashtu i suksesshëm dhe për punën e tij drejtuesit e kompanive janë shprehur në superlativ.
Beka, krahas punë dhe studimeve pasuniversitare, ka ndjekur edhe trajnime të shumta e të ndryshme. Është njohës i mirë i gjuhës angleze dhe i njeh shumë mirë programet kompjuterike, për çka është certifikuar gjatë trajnimeve të ndryshme.
Ai me rastin e pranimit të detyrës së re, ka premtuar se do të zbatoj me përpikëri ligjin dhe se do të jetë maksimalisht transparent dhe i hapur për medie e opinion.
