Prishtinë, 4 gusht - Ministri i Financave, Besim Beqaj, priti sot në takim përfaqësuesin e ri të FMN-së,  Frank Lajkwik, përfaqësues rezident i Fondit Monetar Ndërkombëtar për Kosovë, i cili nga shtatori i këtij viti do ta  zëvendësoj përfaqësuesin aktual të FMN-së, Jose Sulemane i cili ishte i pranishëm në takimin e sotëm.

Ministri Beqaj, gjatë takimit e falënderoi z. Sulemane për punën, kontributin si dhe për bashkëpunimin e tij të ngushtë me institucionet e Kosovës.

Ai, po ashtu  i uroi mirëseardhje dhe detyrën përfaqësuesit të ri të  FMN-së,  Frank Lajkwik  në Kosovë, i bindur se bashkëpunimi i deritanishëm ndrërmjet  FMN-së dhe Kosovës do të vazhdoj edhe në të ardhmen.

Gjatë takimit Ministri Beqaj  e  njoftoi Lajkwik për zhvillimet e fundit rreth buxhetit të Republikës së Kosovës, për përkushtimin e Qeverisë në zbatimin e rregullës fiskale në përgjithësi si dhe rreth stabilitetit makro fiskal.