Prishtinë, 11 shkurt - Zyra e Bashkimit Evropian në Kosovë ka shpallur trembëdhjetë grante të reja në mbështetje të organizatave të shoqërisë civile në Kosovë.

Projektet e dhëna kohët e fundit do të mbështesin përpjekjet e shoqërisë civile në promovimin e dialogut në mes të qeverisë dhe shoqërisë civile, fuqizimin e gruas, promovimin e përfshirjes sociale dhe të të drejtave të komuniteteve pakicë, promovimin e kulturës dhe të të drejtave të njeriut.

Samuel Zhbogar, Shefi i Zyrës së BE-së në Kosovë dhe Përfaqësuesi Special i BE-së tha: \"Të gjitha instrumentet tona për mbështetjen e shoqërisë civile kanë një objektiv kryesor të përbashkët: ne duam të mbështesim zhvillimin e një shoqërie civile që është pjesëmarrëse aktive në debate publike, e cila ka kapacitet për të ndikuar në proceset e politikëbërjes dhe vendimmarrjes, dhe e cila në këtë mënyrë promovon të drejtat e njeriut dhe reformën demokratike \".

Këto projekte implementohen nga “Rrjeti i Grave të Kosovës”, Platforma CIVIKOS në partneritet me CNVOS; “Reggio Terzo Mondo” me “Koalicionin e Strehimoreve të Kosovës” dhe “CCAER”; “World Vision\" në partneritet me Fondacionin “Terre des Hommes”, “Sport Sans Frontières”,

“Qendra për Orientim Shoqëror” në partneritet me “Qendrën për Paqe dhe Tolerancë” dhe “Future without Fear”; “Save the Children International” me “Handikos” dhe “Save the Children Suedi”; “Aktiv” në partneritet me “Qendrën për Paqe dhe Tolerancë”; OJAZAS në partneritet me “Qendrën për Fuqizim Rinor”; “Qendra për Iniciativë të Punëdhënësve” me “Qendrën për Zhvillimin e Biznesit Kragujevc”, “Akcija Zajednicke Pomoci”, dhe “Të Drejtat e Gruas” në partneritet me “Rrethin e Motrave Serbe”.

Fondacioni Kosovar për Shoqëri Civile (KCSF) prezantoi Qendrën e resurseve të shoqërisë civile, të mbështetur nga BE-ja, dhe paraqiti mbështetjen e tij për shoqërinë civile në Kosovë në të ardhmen.

Këto grante financohen nga tre instrumente të ndryshme të shoqërisë civile:

Programi i shoqërisë civile (Civil Society Facility) mbështet zhvillimin e shoqërisë civile për të marrë pjesë në mënyrë aktive në debate publike për demokraci, të drejta të njeriut, përfshirje sociale dhe sundim të ligjit dhe ndërton kapacitetin e tyre për të ndikuar në proceset politikëbërëse dhe vendimmarrëse.

Instrumenti evropian për demokraci dhe të drejta të njeriut mbështet veprimet inovative përmes organizatave të shoqërisë civile në fushën e të drejtave të njeriut dhe demokracisë, për të rritur respektimin e të drejtave të njeriut dhe të lirive themelore dhe për të fuqizuar rolin e shoqërisë civile në promovimin e të drejtave të njeriut dhe reformës demokratike.

Skema e granteve të BE-së për veriun mbështet zhvillimin socio-ekonomik të Kosovës veriore përmes përmirësimit të infrastrukturës komunale bazë, duke ndikuar në këtë mënyrë drejtpërdrejt në zbutjen e papunësisë, fuqizimin e sektorit të bujqësisë, mjedisit, biznesit dhe shoqërisë civile, me synim të përmirësimit të situatës ekonomike, kohezionit social, integrimit dhe bashkëpunimit. 
 
Nga viti 2010, BE-ja ka ofruar mbështetje për organizata të shoqërisë civile me mbi 8 milionë Euro.