Bruksel, 19 tetor - Kancelarja gjermane Angela Merkel apeloi që komisionerit për Çështjet Ekonomike t’i jepen të gjitha kompetencat per t’i vendosur veto buxheteve të vendeve anëtare.

Ajo kërkon ndërhyrjen e tij, me të drejta të plota nëse buxhetet kombëtare shkelin rregullat e bllokut. Idea -parashikohet të kundërshtohet nga anëtarët e tjerë, të cilët do të shqetësohen nga zgjerimi i pushtetit të Komisionit Europian.

Në fillim të samitit të Bashkimit Europian në Bruksel, Presidenti i Këshillit Europian, Herman Van Rompuj, ftoi të gjithë anëtarët për të marrë pjesë në ceremoninë e ndarjes së çmimit Nobel për Paqe në Norvegji.

Samiti pritet të përqendrohet tek plani për Unionin Bankar. Qëllimi është të pranohet fillimisht “mbikqyrja e bankave”, me Bankën Qëndrore Europiane në rolin kryesor, por Britania e Madhe, qendra kryesore financiare e BE-së kërkon mbrojtje për ruajtjen e kompetencave të Bankës së Anglisë.

Përveç saj edhe nëntë vende të tjera, jo anëtare të eurozonës, kanë shprehur shqetësimin për të drejtën e votës mbi propozimin për Unionin Bankar.

UNIONI BANKAR, PLANI ME 3 FAZA I BRUKSELIT

1- Mekanizëm i Vetëm Monitorues

2- Skema e zgjidhjes së përbashkët për të ulur falimentimin e bankave

3- Skema e përbashkët e garantimit të depozitave

Në një intervistë për gazeten britanike “The Guardian” presidenti i Francës, Fransua Holond, tha se nuk ka më kohë për të humbur në ngritjen e Unionit Bankar. Ndërsa 17 vendet anëtare të eurozonës pritet të mbështesin gjerësisht propozimin e Unionit Bankar, 10 të mbeturit hezitojnë që bankat e tyre të përballen me një rregullore të re, pa patur mundësi të thonë fjalën e tyre.

Në samitin që zhvillohet në Bruksel - siç spekullohet - pritet që Spanja të kërkojë një plan të kufizuar shpëtimi.