Prishtinë, 13 tetor - Avokati i Popullit i ka përcjell Komunës së Vushtrrisë, si palë përgjegjëse, Raportin me rekomandime për lirimin e pronës publike komunale të uzurpuar dhe krijimin e kushteve për qasje të papenguar, në rrugën kryesore të fshatit Strofc.

Raporti bazohet në ankesën e palës drejtuar IAP-së lidhur me vështirësitë e lëvizjes dhe qasjes në rrugën publike të fshatit Strofc, e cila rrugë është në pronësi  të Komunës së Vushtrrisë, por që është bllokuar nga një prej banorëve të fshatit në fjalë, duke e pamundësuar shfrytëzimin e saj.

Në Raportin e publikuar sot, Avokati i Popullit konstaton se komuna, respektivisht Drejtoria për Gjeodezi Kadastër dhe Pronë, Drejtoria për Urbanizëm dhe Mbrojtje të Ambientit dhe Drejtoria e Inspeksionit në komunën e Vushtrrisë, ka dështuar të parandalojë pengimin e efekteve negative të ndikimit në mjedis, nga mbyllja e rrugës.

Zvarritja e ndërmarrjes së veprimeve efikase lidhur me pronën publike komunale, me vite të tëra, dëshmon për mosgatishmërinë dhe papërgjegjshmërinë e organeve kompetente komunale, për ndërmarrjen e veprimeve përkatëse, në përputhje me obligimet e tyre ligjore, në raport me qytetarët.

Po ashtu, Avokati i Popullit, thekson obligimin e autoriteteve për t’u përgjigjur në ankesa-kërkesa të qytetarëve, në pajtim me normat e përcaktuara ligjore.

Analiza ligjore thekson obligimin kushtetues të organeve komunale për të reaguar në funksion të respektimit të të drejtave dhe lirive të garantuara të njeriut si dhe sundimit të ligjit e mirëqeverisjes.

Gjithashtu, theksohet se, mos përdorimi i kompetencave të Komunës së Vushtrrisë për të siguruar lëvizjen e lirë dhe të papenguar të qytetarëve të saj, bie ndesh edhe me nenin 2 të Konventës Evropiane të të Drejtave të Njeriut, ashtu siç edhe me konstatimet e Gjykatës Evropiane të të Drejtave të Njeriut se autoritetet duhet të ndërmarrin hapa konkret në mbrojtjen e të drejtave të garantuara.

Bazuar në faktet lidhur me rastin dhe analizën ligjore e konstatimet e dala, Avokati i Populit i rekomandon Komunës së Vushtrrisë, që, në pajtim me kompetencat dhe autorizimet ligjore, të ndërmarrë veprimet përkatëse, në afat sa më të shkurtër kohor, për të liruar rrugën dhe për të garantuar qasjen e papenguar, në rrugën kryesore të fshatit.

Ndërkaq, rekomandimi që i drejtohet Drejtorisë për Gjeodezi Kadastër dhe Pronë dhe Drejtorisë për Urbanizëm dhe Mbrojtje të Ambientit, ka të bëjë me shqyrtimin e kërkesave të palëve dhe obligimit për t’iu përgjigjur atyre brenda afateve të përcaktuara ligjore.