Prishtinë, 3 shkurt - Kryeministri i Republikës së Kosovës, Ramush Haradinaj, përshëndet dhe uron miratimin në lexim të dytë të të Projektligjit për Buxhetin 2019 të Republikës së Kosovës, me 2 miliardë e 370 milionë euro, duke theksuar se ky është buxheti më i madh dhe më zhvillimor i deritanishëm i Kosovës, që do t’i paraprijë rritjes ekonomike prej 4.7 përqind.

Kryeministri Haradinaj vlerëson se me buxhetin më të madh në historinë e saj, Kosova hyn në etapë të re zhvillimore.

“Arsimi me rreth 300 milionë euro dhe shëndetësia me 234 milionë, janë sektorët që përfitojnë më së shumti. Institucionet e sundimit të ligjit dhe mbrojtjes marrin mbështetje të shtuar financiare prej 6% krahasuar me buxhetin e vitit të kaluar. Më shumë siguri dhe më shumë mbrojtje, edhe për qytetarët por edhe për investimet”, thekson kryeministri Haradinaj.

Investimet kapitale, sipas kryeministrit Haradinaj rriten për 11%, apo 75 milionë në raport me vitin 2018, duke mundësuar realizimin e shumë projekteve ekzistuese dhe të reja, si nxitje e madhe për zhvillim ekonomik dhe për sektorin privat dhe se janë akomoduar mjetet për rritjen e pensioneve bazike 20%, për ato kontributdhënëse 15%, si dhe pensionet mujore prej 230 euro për viktimat e dhunës seksuale gjatë luftës.

Kryeministri Haradinaj ndër tjerash e ka uruar Kosovën duke e quajtur këtë si vitin e  kthesës ekonomike.

Njëkohësisht, Kuvendi i Kosovës, ka votuar po ashtu edhe për  Statutin e “Trepçës” ku kryeministri Haradinaj tha se me këtë votim kanë zgjuar gjigantin kosovar dhe se ky është hapi kryesor për t’i dhënë këtij aseti fuqinë për investime dhe gjenerim stabil të të hyrave dhe punësim.

“Votimi i Statutit me 2/3 e votave të Kuvendit dëshmoi unitet të spektrit politik. Ky statut i jep Trepçës legjitimitetin e nevojshëm për të operuar me të gjitha kapacitetet e saja dhe duke e rikthyer atë në funksion të plotë të ekonomisë së vendit, të shtetit të Kosovës dhe të minatorëve” shtoi kryeministri Haradinaj.