Prishtinë, 17 tetor - Kompania “Al Trade” ka fituar tenderë në vlerë prej mbi 30 milionë euro nga Qeveria e Kosovës gjatë viteve të fundit.

Kjo kompani, pronë e vëllezërve Gashani, është fuqizuar tej mase viteve të fundit, sidomos pas ardhjes së Partisë Demokratike të Kosovës në krye të Qeverisë së Kosovës.

E njëjta kompani ka fituar tenderë milionësh edhe nga institucionet ndërkombëtare që veprojnë në Kosovë. Mbi 15 milionë euro është shuma e tenderëve që ka fituar “Al Trade” nga këto institucione, kryesisht nga Komisioni Evropian(KE).

Pas kompanisë “Bechtel & Enka”, e cila është duke e ndërtuar autostradën Morinë- Besi, kohëve të fundit tenderët më të mëdhenj në vend, iu janë besuar kompanisë së vëllezërve nga Drenasi.

Në pesë vitet e fundit kompania e vëllezërve Gashani ka marrë së paku 10 tender, ku secili nga ta kalon shifrën prej një milion euro.

Tenderi i fundit që Qeveria ia ka dhënë kësaj kompanie, është ai për ndërtimin e qendrës së paraburgimit në Prishtinë, vlera e të cilit është hiç më pak se 5 milionë e 845 mijë euro.

KOST-i, 1,7 milionë euro për “Al Trade”

Po ashtu, kjo kompani më 14.05.2013, ka fituar edhe tenderin për renovimin e fasadës se objektit të KOSTT-it. Në këtë tender patën konkurruar 3 kompani, por në fund zyra e prokurimit fitues e patë shpallur kompaninë “Al Trade” me vlerë prej 1,789,427 euro.

Po ashtu, Ministria e Arsimit më 06.11.2009, e pati përzgjedhur kompaninë në fjalë si fituese të tenderit për ndërtimin e shkollës fillore në Klinë të Epërme.

/Zëri/