Prishtinë, 11 gusht - Agjencia Kosovare e Privatizimit (AKP) shpërndan shumën prej 1,525,651 euro për 1752 punëtorë të 10 ndërmarrjeve shoqërore të privatizuara më parë.

Në vazhdën e përshpejtimit të shpërndarjes së 20%-it për punëtorët e ndërmarrjeve shoqërore nga Bordi i Agjencisë Kosovare të Privatizimit, sot është finalizuar dokumentacioni i nevojshëm për shpërndarjen e pjesshme të fondeve të 20%-it edhe për këto 10 Ndërmarrje Shoqërore:

1. NSh “Pashtriku” në Prishtinë,
2. Kooperativa Bujqësore në Talinovc – Ferizaj,
3. NSh “Tregtia” në Ferizaj,
4. NSh “Morava e Epërme” në Viti – Gjilan,
5. NSh “Fabrika e vajit” në Ferizaj,
6. NSh “Elan” në Vushtrri,
7. NSh “Magjistrala” në Prishtinë,
8. NSh “Fabrika për prodhimin e kërpudhave dhe kompostit” në Klinë,
9. NSh “Komuna” në Prizren dhe
10.NSh “Klina” në Klinë

Shuma e fondeve që do të shpërndahet për këto 10 NSh është  1,525,651 euro (një milion e pesëqind e njëzet e pesë mi e gjashtëqind e pesë dhjet e një euro) nga e cila shpërndarje do të përfitojnë edhe 1752 punëtorë të këtyre ndërmarrjeve shoqërore të cilat në këtë fazë i plotësojnë kushtet dhe kriteret e parapara për të marrë një pjesë të 20% kurse në Odën e Veçantë të Gjykatës Supreme të Kosovës (OVGjSK) për këto ndërmarrje shoqërore  janë edhe 159 ankesa të pa shqyrtuara.


Pjesën e mbetur të 20%-it punëtorët e 10 Ndërmarrjeve shoqërore të lartë përmendura do ta marrin pasi që Oda e Veçantë të Gjykatës Supreme të Kosovës merr vendimin përfundimtar lidhur me këto ankesa.

Shpërndarja e kësaj shume dëshmon përkushtimin e Bordit të Drejtorëve dhe menaxhmentit të AKP-së për të përshpejtuar këtë proces dhe për të përfunduar listat e mbetura të pashpërndara nga e periudha e kaluar, në përputhje me vendimin e Bordit të Drejtorëve për shpërndarje të pjesshme të miratuar në fillim të vitit 2010.

AKP rikujton punëtorët e ndërmarrjeve shoqërore të cilat janë privatizuar, se është e përkushtuar për shpërndarjen sa më të shpejtë të mjeteve të 20%-it dhe shpërndarja e këtyre mjeteve është një ndër prioritetet kryesore të AKP-së.

Shuma e përgjithshme e 20 për qind-it të shpërndarë deri më tani ka arritur shifrën prej:  43.265.902 euro nga të cilat  15.657.120 euro gjatë kohës së AKM-së ndërsa  27.608.782 euro gjatë kohës së Agjencionit Kosovar të Privatizimit.