Prishtinë, 16 dhjetor - Bordi i Agjencisë Kosovare të Privatizimit (AKP) në mbledhjen e fundit për këtë vit ka vendosur që t’u japë afat pesë ndërmarrjeve të privatizuara me spin-off special deri më 15 mars të vitit të ardhshëm që të përmirësojnë performancën e tyre, në të kundërtën ato rrezikojnë të kthehen në ri-tenderim.

Ndërmarrjet të cilat rrezikojnë të kthehen në AKP, e të cilat kanë shkelur kushtet e marrëveshjeve dhe zotimeve, janë Miniera e Goleshit, Ndërmarrja e Re XIM Strezovc, ndërmarrja e Re IDGJ Tobaco, Hotel “Grand” dhe “Agrokosova Holding”.

Kryetari i Bordit të AKP-së Dino Asanaj, ka thënë se në mbledhjen e bordit të AKP-së është vendosur që këtyre pesë ndërmarrjeve t’iu jepet afat për plotësimin e kushteve deri më 15 mars.

"AKP ka trashëguar nga Agjencia e mëparshme 25 ndërmarrje të privatizuara me spin-off special. Deri më tani AKP i ka liruar 16 ndërmarrje si rrjedhojë e përmbushjes së zotimeve sipas marrëveshjes. Gjatë këtij viti janë liruar 4 ndërmarrje: “Mulliri i Miellit” Fushë Kosovë; “M&Sillosi”; “Modeli” dhe “KosovaTex”", ka thënë Asanaj.

Ndërsa sipas tij janë edhe 8 ndërmarrje që janë në procesin e përmbushjes së zotimeve, prej tyre 5 Ndërmarrje janë në shkelje më të rënda të kushteve të marrëveshjes së zotimeve dhe u janë shqiptuar gjoba mbi 30 milionë euro.

Me qëllim të mbrojtjes dhe ruajtjes së pasurisë së ndërmarrjeve, gjatë këtij viti AKP sipas Asanaj ka përfshirë nën administrim direkt 3 ndërmarrje: “Ereniku-Industria”, Gjakovë; pastaj “Enti Medecinal për Terapi Fizikale dhe Rehabilitim” - Banjë afër Pejës dhe së fundi NSh “Sharrprodhimin”.

Po kaq NSh AKP i ka liruar nga administrimi direkt dhe i kemi përfshirë në privatizim. Aktualisht nën administrim direkt janë 9 NSh.
 
Po ashtu, Dino Asanaj paraqiti të arritura e AKP-së gjatë këtij viti, ndër të cilat përmendi ri-tenderimin e ndërmarrjes “ Llamkos” me një çmim prej 6.5 milionë euro dhe tërheqjen e 16 mijë e 800 investitorëve për pjesëmarrje në procesin e privatizimit.

"Gjatë këtij viti kemi mbajtur 6 valë të privatizimit të NSh-ve, një Valë më shumë se sa parashikimet me plan biznesi për këtë vit, që është tregues suksesi i AKP-së në përshpejtimin e procesit të privatizimit", ka theksuar Asanaj.

Përveç kësaj ai ka theksuar se ka mbajtur 5 valë të shitjeve të aseteve me likuidim, ku përfshihet edhe përmbylljen me sukses e ritenderimit të Llamkos-it me çmim 6.5 milionë euro.

Tani më blerësi i ri ka filluar prodhimin në Fabrikë, punëtorët kanë zënë vendet e tyre të punës që do të ndihmon ekonominë e Vushtrisë dhe të Kosovës.

Nga privatizimet dhe shitjet e aseteve për këtë vit janë mbledhur 69 milionë euro.

Asanaj ka bërë të ditur se deri tani numri i NSh-ve që janë privatizuar është 306, ndërsa janë krijuar 670 Ndërmarrjeve të Reja, nderkaq janë mbledhur në total mbi 584 milionë euro, nga privatizimi 555 milionë euro, ndërsa nga shitja e aseteve me likuidim 48 milionë euro.

Një sukses domethënës Agjencia sipas Asanajt ka shënuar edhe me tërheqjen e investitorëve për pjesëmarrje në procesin e privatizimit. Të dhënat tregojnë se deri më tani procesi i privatizimit ka tërheqë mbi 16.800 investitorë.

Sa i përket shpërndarjes së 20 %, deri më tani kemi aprovuar 227 lista të punëtorëve; kemi shpërndarë 49 milionë euro, prej të cilave vetëm për 2011 kemi shpërndarë rreth 15 milionë euro.

"Në proces të shpërndarjes i kemi edhe mbi 4 milionë euro për 14 NSh. Gjatë takimit të sotëm aprovuam edhe 3 lista përfundimtare të punëtorëve dhe menaxhmenti autorizohet që të bëjë shpërndarjen e përkohshme të 20 % për këto ndërmarrje: NSh “Stacioni i Veterinës”-Kamenicë; “KB Malisheva”-Malishevë dhe NSh “Elmont”-Pejë. Në total kanë përfituar mbi 28.000 punëtorë."