Prishtinë, 3 nëntor - Ministri i Mjedisit dhe Planifikimit Hapësinor, Ferid Agani, ka pritur të martën në një takim kryetarin e Komunës së Ferizajt, Muharrem Sfarqën.

Në këtë takim u diskutuan temat që ndërlidhen me projektet mjedisore, por edhe ato në fushën e planifikimit hapësinor, me theks të veçantë plani rregullativ për Komunën e Ferizajt, ku kryetari Sfarqa përkitazi më këtë çështje kërkoi ndihmën e MMPH-së.

Agani tha se ministria që ai drejton është e interesuar që njëherë e përgjithmonë të vëjë në binar çështjen e planifikimit hapësinor dhe për këtë gjë pohoi se janë në bashkëkoordinim të plotë me nivelin komunal.

Po ashtu u bisedua edhe për mundësinë e funksionalizimit të bifurkacionit të lumit Nerodime, i cili do të ndikonte në rritjen e zhvillimit ekonomik të asaj pjese.