Kaliforni, 3 mars - “Facebook” hoqi dorë në heshtje nga shërbimi i vet i postës elektronike, e cila u dha përdoruesve një adresë email-i “@facebook.com”. Tani e tutje, email-et e dërguara në këto adresa do të përcillen automatikisht tek adresat e email-it me të cilat përdoruesit kanë hapur llogaritë e tyre në rrjetin social.

Shërbimi filloi në nëntor 2010 dhe u paraqit si një mënyrë për të përqendruar komunikimin e përdoruesve të internetit në një platformë të vetme. Ai u kritikua më 2012, kur “Facebook” zëvendësoi adresat e publikuara të postës elektronike të përdoruesve të vet me adresat e reja në profilet e tyre. Kompania e tërhoqi këtë lëvizje më vonë.

“Facebook” është një kompani që vlerësohet shumë në bursë, por sërish shumë analistë thonë se nuk shohin të ardhura të mjaftueshme për të justifikuar vlerën e aksioneve të saj.