New York, 2 gusht - Mbase ju kujtohet që me mbështjellësin e mëhershëm nga Typo, iPhone’i juaj mund të dukej shumë ngjashëm me BlackBerry, për shkak të tastierës fizike e cila ngjitej në telefon.

Në fakt, Typo 2 është një tastierë fizike shtesë e cila i ngjitet iPhone, për t’ua mundësuar përdoruesve të shkruajnë nga tastiera me butona, në vend të asaj elektronike e cila është e ndjeshme në prekje, shkruan gazeta Tribuna.

Mirëpo, problemi me versionin e parë të tastierës së Typo ishte se i ngjante shumë asaj të telefonave BlackBerry, dhe për këtë fakt, kjo e fundit nuk ishte aspak e lumtur, dhe vendosi ta padisë prodhuesin e tastierës Typo.

Edhe pse Typo tha se nuk e ka kopjuar dizajnin e tastierës së BlackBerry, modelin e dytë të tastierës e ka ndryshuar, dhe e ka quajtur Typo 2, ndërsa me këtë version nuk pritet të ketë më probleme me kompaninë kanadeze, e cila njihet për tastierën unike të telefonave të saj.

Typo 2 tashmë është vënë në para-porosi dhe e njëjta mund të blihet për 99 dollarë, dhe të vendoset në iPhone 5 apo iPhone 5S. Natyrisht, këtë do ta blini nëse jeni të interesuar që telefonin tuaj të Apple ta bëni me tastierë fizike, dhe ta përdorni si një mini-kompjuter personal.