Huawei prezantoi tabletin MediaPad X2
Kompania prezantoi sot në Kongresin Botëror të Telefonave pasardhësin e MediaPad X1, tabletin Mediapad X2.
Tableti ka ekran 7 inç IPS me rezolucion 1920×1200 pikselë, i cili mbulon 80% të pjesës ballore të pajisjes.
MediaPad X2 fuqizohet nga procesori Kirin 930 me arkitekturë 64-bit me tetë bërthama me shpejtësi 2 GHz.
Kamera e pasme 13 megapikselë përmban një çip të veçantë ISP, që thuhet se do të sjellë disa përmirësime tek kamera. Kamera frontale është 5 megapikselë, transmeton krokodili.al.
Pajisja do të jetë në dispozicion në dy versione, një me 2GB RAM dhe 16GB hapësirë të brendshme, ndërsa versioni tjetër do të ketë 3GB RAM dhe 32GB hapësirë të brendshme. Sa i përket lidhjes, ky tablet ofron dy vende për karta SIM dhe lidhjen LTE Cat.6.
Tableti do të ketë gjithashtu bateri me kapacitet 5,000mAh, e cila do të jetë e mjaftueshme për të dëgjuar 60 orë muzikë, për të parë 12 orë video, dhe për të shfletuar 15 orë në internet. MediaPad X2 do të operojë me sistemin Android 5.0.
