Prishtinë, 28 tetor - Nisma e Ministrisë të Zhvillimit Ekonomik \"Gratë në TIK\" ka për qëllim t\'ua hapë dyert grave për punësim formal në fushën e TIK-ut, ngase Kosova e ka vendosur zhvillimin e mëtutjeshëm të ekonomisë së saj digjitale si një nga prioritetet e saj kryesore politike. Kështu u tha sot në Forumin “Gratë në TIK” që u organizua nga Ministria e Zhvillimit Ekonomik, Banka  Botërore dhe Ambasada e Norvegjisë Prishtinë.   

Zëvendësministrja e Zhvillimit Ekonomik, Besa Zogaj-Gashi tha se ky Forum ka për qëllim mbledhjen e akterëve kryesorë të fushës së TIK-ut, me fokus gratë për të diskutuar për mundësitë dhe fuqizimin e tyre, me synim që ky organizim të bëhet në baza vjetore për të përcjell zhvillimet në këtë sektor.

“Qeveria e Kosovës po bën përpjekje për të aktivizuar më shumë gra në sektorin e punës, rrjedhimisht në sektorët strategjik siç është edhe TIK, ku ka përfituar përkrahje nga Banka Botërore për implementimin e një pilot projekti, i cili do të testojë përshtatshmërinë e punës online për gratë e papunësuara në zonat rurale, projekt ky i cili do të zgjerohet në të gjitha Komunat e  Kosovës”, tha ajo.

Ajo bëri të ditur se MZHE  tashmë ka krijuar një Bord Këshillëdhënës joformal i përbërë nga përfaqësues të Qeverisë, sektorit privat, OJQ-të dhe  institucionet akademike, i cili do të ndihmojnë agjendën e MZHE-së për gratë në TIK.

Ministri i Financave, Avdullah Hoti thekoi se iniciativa e  MZHE-së për krijimin e Fondit për punësim në TIK  është iniciativë e cila do të ndikojë në përmirësimin e punësimit e të rinjve e veçanërisht të grave.

Ndërsa, Hikmete Bajrami, Ministre e Tregtisë dhe Industrisë  tha se  mbajtja e këtij Forumi nënkupton qasjen serioze që Qeveria po i jep fushës së TIK-ut, e veçanëarisht rolit të gruas në këtë fushë, me qëllim të përmirësimi të pozitën së saj në punësim në sektorin privat dhe atë publik.

Ministër i  Punës dhe Mirëqenies Sociale, Arban Abrashi duke mbështetur këtë  iniciativë, është shprehur i bindur se fuqizimi i grave në fushën e TIK-ut do të ndikojë edhe në zbutjen e nivelit të papunësisë.

Jan Peter Olters, Menaxher për Kosovë i Bankës Botërore, tha shumica e punës online mund të kryhet nga çfarëdo vendi, në çdo kohë dhe në mënyrë shumë fleksibile. Si e tillë, secila mundësi-potencialisht marramendëse e këtij sektori do t\'ua mundësonte sidomos të rejave nga zonat rurale të bëhen pjesë e punësimit formal pa marrë parasysh largësinë e vendbanimeve të tyre ose obligimeve e tjera familjare që i kanë.

Edhe Ambasadori i Norvegjisë në Kosovë, Jan Braathu ka ikurajuar të rinjtë, e në  veçanti femrat që të angazhohen në këtë sektor, ngase ky sektor u takon të gjithëve.

Ndryshe, Qeveria e Republikës së Kosovës dhe Banka Botërore janë duke i mbështetur gratë në sektorin e teknologjisë informative dhe të komunikimit (TIK). Përmes financimit të pilot projektit \"vende pune të gjelbra\", këto dy institucione do t\'u ndihmojnë së paku 100 grave nga zonat rural që janë të papunësuar/punësuara pjesërisht të përvetësojnë shkathtësi teknike dhe të komunikimit, të nevojshme për punë online.