New York, 10 shtator - Rrjeti Facebook është tërhequr nga lufta për censurë lidhur me një fotografi legjendare të luftës. Në këtë luftë theksoheshin politikat e këtij mediumi social dhe për forcën gjithnjë e më të madhe në udhëzimin e shikueshmërisë dhe lexueshmërisë së informacioneve.

Facebook tha se do ta lejoj publikimin e një fotografie të agjencisë Associated Press, të njohur si “vajza napalm” disa javë pasi nuk kishte lejuar që një person nga Norvegjia ta postonte atë në faqen e tij në Facebook.

Fotografia e autorit Nick Ut e paraqet një vajzë të zhveshur vietnameze duke u larguar nga sulmi me bombë napalm, që konsiderohet si njëra nga pamjet më ikonike të Luftës së Vietnamit.

Por, kjo vajzë në fotografi është e zhveshur, dhe Facebook tha se paraqet shkelje të rregullave të tij të përdorimit dhe nuk e ka lejuar publikimin e fotografisë.

Pas disa javësh të protestës nga gazeta më e madhe e Norvegjisë, e bile edhe nga kryeministri i këtij vendi, gjiganti social medial mbrëmë është tërhequr nga vendimi i vet dhe e ka lejuar përdorimin e fotografisë.

Facebook është shndërruar në portal primar, në të cilin njerëzit në gjithë botën i marrin lajmet e tyre, fakt ky që i ka shqetësuar organizatat mediale, që kanë frikë për censurë ose humbje të lexuesve apo të ardhurave nga reklamat.