Prishtinë, 22 qershor - Lëvizja “Vetëvendosje” do të mbajë sot protestën popullore të paralajmëruar ditë më parë me moto "Kundër Hajnisë".

Albin Kurti ka thënë se pas vjedhjes së votave në Kosovë po vjedhet buxheti, pasuria dhe territori i Kosovës.

"Buxheti po vjedhet me korrupsion në tendera, pasuria po vjedhet me privatizimin e egër kurse territori po vjedhet në negociata me Serbinë", ka theksuar Kurti.

Kjo qeveri sipas tij pasuritë dhe tokën e Kosovës i konsideron si barrë nga e cila duhet të lirohet paraqet barrë për popullin dhe shtetin tonë.

Çmimet dhe papunësia po rriten për qytetarët kurse luksi dhe postet po shtohen për qeveritarët.

Kurti me tej ka theksuar se Buxheti i Kosovës trajtohet si një plaçkë që Qeveria e ka merituar ndërsa qytetarët si shërbëtorë që qeveria iu gjen vend pune nëse janë të dëgjueshëm.

"Në Kosovë po blehet posti publik, por janë qytetarët ata që duhet ta dëshmojnë se nuk mund të blehet heshtja e tyre", ka pohuar ai.

Prandaj, të mërkurën e ardhshme, me 22 qershor, në Prishtinë, Lëvizja Vetëvendosje! organizon protestë paqësore kundër hajnisë së qeveritarëve ndaj pronës dhe ardhmërisë së qytetarëve.

Me aktakuzat e reja ndaj zyrtarëve të lartë publikë e shtetërorë sipas Vetëvendosjes po i ngushtohet rrethi kryeministrit Thaçi.

Protesta pritet të nisë në orën 12:00 nga Bibloteka Kombëtare ku mijëra persona pritet të marshojnë drejt ndërtesës qeveritare, ku organizatorët do të mbajnë fjalime.

“Kundër Hajnisë” është motoja e kësaj proteste, dhe Vetëvendosja thotë se në Kosovë aktualisht po ndodhin vjedhje të mëdha.

“Manipulimi me tenderët që u jepen zakonisht e kryesisht biznesmenëve që janë miq të qeverisë; shitja e ndërmarrjeve publike me këtë privatizim të egër që u mbush xhepat ministrave; dhe marrëveshjet e paralajmëruara me Serbinë që vjedhin territorin e Kosovës”, ka thënë lideri i lëvizjes Albin Kurti.