Prishtinë, 22 shkurt - Programi për Zhvillim i Kombeve të Bashkuara (UNDP)  dhe Ministria e Diasporës nënshkruan sot, 22 shkurt, një marrëveshje për bashkëpunim në implementimin e projektit Angazhimi i Diasporës në Zhvillimin Ekonomik.

Marrëveshja, që kap vlerën prej 75,000 Euro, u nënshkrua nga Alessandra Roccasalvo, Zëvëndës Përfaqësuese e Përhershme e UNDP-së dhe Osman Shahini, sekretar permanent në MoD.

Kjo shumë do të kontribuojë në realizimin e fushatës informuese dhe sensibilizuese për promovimin Regjistrimit të Diasporës që do të zbatohet gjatë vitit 2016 nga projekti DEED.

Projekti DEED është duke u implementuar së bashku nga Programi i Kombeve të Bashkuara për Zhvillim (UNDP) dhe Organizata Ndërkombëtare për Migrim (IOM).

Ky projekt synon ofrimin e mundësive për kosovarët që jetojnë jashtë vendit për të qenë aktivë në zhvillimet ekonomike të Kosovës duke përkrahur krijimin e vendeve të punës dhe ndërmarrësisë përmes investimeve dhe ndryshimit të shfrytëzimit të dërgesave për konsumim.