Prishtinë, 23 shtator - I kryesuar nga Ministri i Drejtësisë, Hajredin Kuçi, sot u mbajt takimi i radhës i përbashkët i krerëve dhe përfaqësuesve të Këshillit Gjyqësor dhe Prokurorial, Gjykatës Supreme të Kosovës, Policisë së Kosovës, Ministrisë së Financave, Agjencisë Kundër Korrupsionit, Agjencisë Kosovare të Inteligjencës, Bankës Qendrore,  Njësia e Inteligjencës Financiare dhe Gary Hyde, përfaqësues i Thesarit Amerikan.

Qëllimi i takimit ishte prezantimi i strategjisë për themelimin e Zyrës Kombëtare për Koordinim të Luftimit të Krimeve Ekonomike, ku Gery Hyde nga Thesari Amerikan prezantoi strategjinë për themelimin dhe kompetencat e kësaj zyre.

Zëvendëskryeministri Kuçi duke vlerësuar si të nevojshme themelimin e kësaj zyre, si dhe ka shprehur bindjen e tij se kjo zyre do të koordinojë aktivitetet ndërinstitucionale në luftë kundër krimeve ekonomike, me ç’rast ishin të pajtimit edhe përfaqësuesit e institucioneve tjera pjesëmarrëse.

Në fund të takimit u vendos që të themelohet Zyra Kombëtare për Koordinim të Luftimit të Krimeve Ekonomike e cila do të udhëhiqet  nga një prokuror i cili do të ushtrojë detyrën në mënyrë të pavarur.

Po ashtu të pranishmit u pajtuan që të rregullohet infrastruktura ligjore, të sigurohen mjete buxhetore dhe zyra të funksionojë me një strategji të qartë,  në mënyrë që të mos ketë konflikt kompetencash ndër institucionale.