Prishtinë, 3 shkurt - Gjykata e Apelit e Kosovës ka refuzuar si të pa bazuara ankesat a mbrojtësve të te pandehurve N.A. dhe L.M., kundër caktimit të masave të sigurisë, prej një muaji.

Kolegji penal prej tre gjyqtarësh i kësaj gjykate, ka  vendosur që të mbetet në fuqi aktvendimi i Gjykatës Themelore në  Mitrovicë, i datës 26.01.2016, sipas të cilit të dyshuarit N.A.  i është  shqiptuar masa e paraburgimit prej 30 ditësh, ndërsa të dyshuarës L.M., ajo e arrestit shtëpiak, po ashtu prej 30 ditësh.

Sipas prokurorisë ndaj  dy të pandehurve ekziston dyshimi i bazuar se kanë kryer veprat penale: Vjedhje e rëndë nga neni 327, lidhur me nenin 31 të Kodit Penal të Republikës së Kosovës; Keqpërdorim i pozitës apo autoritet zyrtar nga neni 422; Përdorim i pa  autorizuar i pasurisë nga neni 427 si dhe Manipulim me prova nga neni 397, i të njëjtit kod.

Kjo pasi që dyshohet se rreth 10 ditë me parë , ata  në koordinim me personat tjerë, kanë plaçkitur një bankë në veri  të Mitrovicës, me ç’ rast dyshohet të kenë vjedhur 320 mijë euro  dhe 1000 qeqe blanko te pa plotësuara, si dhe kane marr me vete të gjitha xhirimet e video- kamerave te sigurisë.

Gjykata e Apelit vlerëson se gjykata e shkallës se parë ka dhënë arsye të mjaftueshme mbi bazat ligjore  në bazë të te cilave ka caktuar masat në fjalë.