Prishtinë, 29 mars - Shërbimi Korrektues i Kosovës (SHKK) është duke bërë përpjekje të vazhdueshme për ngritjen e kapaciteteve të reja, ku deri në fund të këtij viti pritet edhe funksionalizimi i Burgut të Sigurisë së Lartë, si institucion shumë i rëndësishëm për këtë shërbim, ndërsa do të ndërtohen Qendra e Paraburgimit në Gjilan dhe Prishtinë, institucioni i tipit të hapur për masë korrektuese-edukuese për të mitur dhe forenzika psikiatrike e cila do të ndërtohet në bashkëpunim me Komisionin Europian\", kështu tha Drejtori i Përgjithshëm i SHKK-së Resmi Hoxha.

Ai këtë e ka thënë në një konferencë për media ku paraqiti punët dhe sfidat e këtij shërbimi, si dhe punët që janë duke u zhvilluar për mbajtjen e testit me shkrim për pozitën e Oficerit Korrektues në Burgun e Sigurisë së Lartë, sipas tij ndërtimi i këtyre institucioneve do të lehtësojë punën në SHKK.

Drejtori Hoxha tha se Shërbimi Korrektues i Kosovës edhe pse relativisht i ri, është njëri ndër shërbimet që plotëson standardët ndërkombëtare. Sipas tij, kjo është bërë falë investimeve të mëdha që janë bërë nga Qeveria e Kosovës dhe punëve që bëhen në të.

Duke folur për punët që janë duke u bërë lidhur me mbajtjen e testit me shkrim për pozitën e Oficerit Korrektues në Burgun e Sigurisë së Lartë, Drejtori Hoxha tha se për 130 vende kanë konkurruar afër 4 mije persona.

Ai tha se është formuar komisioni i cili edhe ka shqyrtuar të gjithë dokumentacionin e konkurrenteve dhe duke u bazuar në kriteret e parapara me konkurs, ka hartuar listën prej 2313 personave me të drejtë për t’ju nënshtruar provimit i cili do të mbahet të dielën me 31 Mars 2013, në lokalet e Fakultetit Juridik dhe Ekonomik të Universitetit të Prishtinës.

Duke specifikuar procedurat e mbajtjes se provimit, Drejtori Hoxha tha se të gjitha informatat rreth afateve kohore për procedurat e mëtejme të rekrutimit, si dhe emrat e kandidatëve bashkë me sqarimet e nevojshme për vendin dhe kohën e mbajtjes së testit, mund të gjendën në ueb-faqen e Ministrisë së Drejtësisë.

Drejtori Hoxha tha se ka ftuar organizata të shoqërisë civile që të bëjë monitorimin e procedurave që do të zhvillohen për zgjedhjen e 130 oficereve korrektues për Burgun e Sigurisë se Lartë.

Për transparencën në procedurat e zgjedhjes se kandidatëve, ka folur edhe Drejtori i Burgut të Sigurisë së Lartë, Naim Maloku.