Ferizaj, 30 qershor - Një aksident fatal ka ndodhur dje në Ferizaj, me ç\'rast një person ka humbur jetën. Rasti ka ndodhur në fshatin Talinovc.

Policia raporton se një mashkull shqiptar gjersa ishte duke drejtuar veturën ka humbur kontrollin dhe ka dalë jashtë rrugës, me ç’rast është rrokullisur. \"Si pasojë e aksidentit, ngasësi i veturës ka pësuar lëndime vdekjeprurëse. Mjeku kujdestar ka konstatuar se viktima nuk ka shenja jete dhe me urdhër të prokurorit trupi i pajetë është dërguar në Institutin e Mjekësisë Ligjore për obduksion\", thuhet në raportin e policisë.

Ndërsa në fshatin Koshare në Ferizaj ka ndodhur një aksident trafiku në të cilin janë përfshirë dy vetura dhe një biçiklist. \"Si pasojë lëndime trupore kanë pësuar dy femra dhe një mashkull shqiptar, të cilët janë dërguar për trajtim mjekësor. Me vendim të prokurorit rasti vazhdon të hetohet në procedurë të rregullt\", thuhet në raportin e policisë.