Prizren, 8 qershor - Prokuroria Themelore në Prizren, Departamenti i Përgjithshëm ka ngritur aktakuze ndaj dy personave, O.C. dhe B.B., dhe personit juridik – biznes me seli në fshatin Landovicë, Komuna Prizren.

Aktakuza është ngritur për shkak të dyshimit se të akuzuarit O.C. dhe B.B., prej vitit 2010, e në vazhdim, si persona përgjegjës për sigurim dhe shëndetin në vendin e punës, në biznesin me seli në fshatin Landovicë, Komuna Prizren, nga pakujdesia, nuk veprojnë në pajtim me dispozitat dhe rregullat teknike mbi masat për sigurinë në vendin e punës dhe me këtë rrezikojnë jetën e njerëzve, në atë mënyrë që duke e shfrytëzuar në mënyrë të kundërligjshme argjilën dhe lëndë të tjera minerale, nuk zbatojnë kriteret e parapara për shfrytëzimin e argjilave, me ç’ rast gropat e krijuara në dyshemenë e fushës së shfrytëzimit ishin mbushur me ujë dhe si pasojë e kësaj më 16.06.2015, në këtë gropë me ujë mbyten dy fëmijë njëri 11 vjeç dhe tjetri 9 vjeç.

Me këto veprime secili veç e veç kanë kryer veprën penale asgjësimi, dëmtimi ose heqja e pajisjeve mbrojtëse dhe sigurimi i sigurisë në vendin e punës nga neni 367, paragrafi 7 lidhur me paragrafin 2 dhe me nenin 81 të Kodit Penal të Kosovës.

Ndërsa i akuzuari O.C., si person përgjegjës i biznesit akuzohet edhe për veprën penale ndotja, degradimi ose shkatërrimi i mjedisit nga neni 347, paragrafi 1 lidhur me nenin 81 të Kodit Penal të Kosovës.

Po ashtu edhe biznesi si person juridik akuzohet për veprën penale asgjësimi, dëmtimi ose heqja e pajisjeve mbrojtëse dhe sigurimi i sigurisë në vendin e punës nga neni 367, paragrafi 7 lidhur me paragrafin 2 dhe me nenin 81 të Kodit Penal të Kosovës dhe veprën penale degradimi ose shkatërrimi i mjedisit nga neni 347, paragrafi 1 lidhur me nenin 81 të Kodit Penal të Kosovës.