Prishtinë 16 nëntor - Polica  e Kosovës ka njoftuar se e mbështetur në strategjitë që dalin për luftimin e krimit të organizuar dhe realizimit të objektivave të saj, me sukses të vazhdueshëm është duke u treguar efikase dhe ketë e dëshmon me rezultatet e punës se saj.

Si rezultat mbrëmë rreth orës 21:00, hetues nga Drejtoria e Hetimit të trafikimit me narkotik kanë bërë arrestimin e të dyshuarit nën dyshimin e bazuar se i njëjti ka kryer veprën penale “ trafikim me substanca narkotike”.

Hetuesit policor të mbështetur nga  policia rajonale e Gjilanit, në rajonin Gjilanit  gjatë një pike kontrolli kanë ndaluar veturën BMW me targa të Republikës së Serbisë të cilën e drejtonte një mashkull shqiptar shtetas  i Serbisë.

Gjatë kontrollit në bagazhin e veturës  janë gjetur 3 çanta sportive në brendësin e të cilave janë  gjetur 42 paketime të dyshuara  narkotike të llojit marihuan në peshë rreth 44 kg.

Personi i dyshuar është arrestuar në vendin e ngjarjes, i është konfiskuar vetura dhe janë konfiskuar substancat narkotike.

Të gjitha këto veprime kanë qenë të koordinuar me prokurorinë themelore për krime të rënda të Gjilanit  dhe të dyshuarit i është caktuar masa  e ndalimit për 48 orë për të vazhduar me procedura të mëtutjeshme hetimore.