Prishtinë, 6 tetor - Policia e Kosovës, konkretisht Drejtoria për Hetimin e Trafikimi me Narkotikë, me datën 5 tetor 2016, ka realizuar një operacion policor, nën dyshimin e bazuar se në një shtëpi në lagjen Velania një i dyshuar posedon një sasi të substancave narkotike, si dhe posedon armë e municion.
 
Operacioni policor është realizuar edhe në bashkëpunim me Njësinë për Reagim të Shpejtë, me ç’rast Policia e Kosovës ka arrestuar dy persona të dyshuar, nën dyshimin e bazuar se po kryenin veprat penale ‘blerje, posedim, shitje ose shpërndarje e  paautorizuar e narkotikëve, substancave psikotrope ose  analoge nga neni-273’,  dhe ‘mbajtje  në pronësi , kontroll ose posedim të paautorizuar të armëve nga neni 374’.
 
Të dyshuarit e arrestuar në këtë rast janë: A. P. lindur me 1996 dhe S. L. lindur me 1996 nga Shqipëria.

Me urdhëresë të Gjykatës Themelore është bërë bastisja e të dyshuarve, ku në cilësi të provave materiale janë gjetur dhe konfiskuar: dy armë automatike AK47; 4 karikatorë të automatikut AK47; 86 copë fishekë; një revole 7.62 mm –M57 me dy karikatorë dhe 19 fishekë; substancë e dyshuar narkotike e llojit marihuanë me peshë 448.9 gramë dhe 3 telefona celularë.
 
Me aktvendim të prokurorit të dyshuarit dërgohen në qendrën e mbajtjes per procedura të mëtejme.