Policët e MPB-së serbe 30 ditë paraburgim në Kosovë
Rasti është marrë përsipër nga një gjykatës i procedurës paraprake të EULEX-it pasi që lënda i është kaluar në kompetencë Prokurorisë Speciale të Kosovës (PSRK-së).
Gjykatësja e EULEX-it, Mariola Pasnik i ka caktuar masën e paraburgimit prej një muaji për pesë nga gjashtë pjesëtarët e Ministrisë së Brendshme Serbe të arrestuar në rajonin e Gjilanit.
Njëri nga të dyshuarit është liruar. Pas dëgjimit nga gjykatësi i procedurës paraprake mbrëmjen e djeshme, gjykatësi i EULEX-it urdhëroi vazhdimin e masës së paraburgimit për tridhjetë ditë për pesë të dyshuarit. EULEX-i do të vazhdojë ta monitorojë nga afër këtë rast.
Pala mbrojtëse serbe e përfaqësuar nga avokati Dejan Vasiq ka kërkuar lirimin e të ndaluarëve, mirëpo gjykata nuk ka pranuar këtë kërkesë dhe ka shqiptuar masën e paraburgimit për: Zlatko Deniq, Mladen Dimitrijeviq, Nikolla Trajkoviq, Dragan Stojkoviq dhe Goran Matropazoviq.
Akuza i rëndon ata se kanë vepruar kundër interesit juridik të Kosovës. Atyre u janë gjetur uniforma të Policisë serbe e distiktive të MUP-it serb.
Në shtëpitë e tyre janë gjetur dhe janë konfiskuar armë të ndryshme dhe gjësende të tjera.
Ndërkohë, ministri i Brendshëm serb, Ivica Daçiq arrestimin e ka quajtur akt provokimi nga Prishtina zyrtare.
Sipas tij, të arrestuarit, punëtorë të MUP-it, jetojnë në Gjilan, ndërsa punojnë në Vranjë.
