Prishtinë, 20 dhjetor - Me rastin e festave të fund vitit, Orkestra Frymore e FSK-së ka dhënë një koncert festiv.

Në koncert morën pjesë, ministri Agim Çeku, komandanti i FSK-së gjenerallejtënant Kadri Kastrati, komandanti i KFOR-it, ish-ministri i FSK-së Fehmi Mujota, ambasadori i Republikës së Kosovës në Shqipërisë Sylejman Selimi, oficerë të KFOR-it, të FSK-së, atashe ushtarakë si dhe personalitete të tjera të jetës politike, artistike dhe kulturore.

Në fjalën e tij, ministri Agim Çeku, pasi ka përshëndet mysafirët, falënderoi të gjithë ata që e kanë mbështet ngritjen e FSK-së, për të shtuar:

”Është kënaqësi që jemi mbledhur sot këtu për ta fuqizua miqësinë dhe bashkëpunimin tonë, ta përcjellim së bashku këtë vit dhe të shikojmë me optimizëm drejt vitit të ardhshëm.

Forca e Sigurisë së Kosovës është e përkushtuar të bëhet një forcë aktive dhe e dukshme, një institucion i përkryer i cili do t’i shërbejë të gjithë qytetarëve dhe po kontribuon në ndërtimin e paqes dhe stabilitet në rajon dhe në botë.

Edhe këtë vit ne kemi punuar shumë dhe kemi arritur një progres të dukshëm në shumë fusha.

Ne e kemi thelluar partneritetin tonë bilateral dhe i kemi nënshkruar disa Marrëveshje Bashkëpunimi me shtetet tona partnere, kemi marr pjesë në iniciativa dhe ngjarje të rëndësishme të lidhura me çështjet e sigurisë, e kemi themeluar Qendrën e Ekselencës për Kërkim-Shpëtim nga e cila do të përfitojë i gjithë Rajoni, kemi kaluar Ligjin e pensioneve për FSK-në, jemi pajisur me uniforma te reja unike moderne dhe funksionale”.

Ministri Çeku foli edhe për besimin e madh që ka FSK-ja tek qytetarët e Kosovës.

“ Për mua është shumë i rëndësishëm fakti që FSK-ja është ndër institucionet më të besuara të Kosovës. Kjo ka një domethënie të madhe dhe na inspiron që të punojmë edhe më shumë për të mirën e vendit dhe popullit tonë”.

Për kultivimin e vlerave artistike dhe kulturore në FSK-së, ministri Çeku, tha:” Ne jemi vazhdimisht duke i kultivuar vlerat dhe traditat tona, por edhe identitetin tonë.

Si pjesë e kësaj përpjekje kemi themeluar Orkestrën Frymore të Forcës së Sigurisë së Kosovës një Orkestër i cili aktualisht është i përbërë nga më shumë se 30 muzikantë të rinj, profesionistë të profesioneve të ndryshme, qoftë pjesë e Filarmonisë, qoftë profesorë, arsimtarë, mësimdhënës të edukatës muzikore që vullnetarisht janë lajmëruar të jenë pjesëtarë edhe të FSK-së”.

Në fund, ministri Agim Çeku ua uroj të gjithëve Krishtlindjet dhe një Vit të Ri dhe të suksesshëm dhe njëherit kërkoi që bashkërisht ta përcjellin koncertin e parë të ekzekutuar nga Orkestra Frymore e Forcës së Sigurisë së Kosovës.

Pastaj, Orkestra Frymore e FSK-së, dha një koncert me vepra të famshme botërore dhe kombëtare.

Këngët “Valsi i lumturisë, “Kënga për heroin e kombit tim”, “Hej ju male”, “Agimet Shqiptare”, etj, ishin disa nga veprat artistike të interpretuara me sukses nga Orkestra Frymore e FSK-së.

Interpretimi i këngëve ushtarake dhe klasikë, nën dirigjimin e Toger Baki Jasharit u përcoll me një interesim të madh dhe me duartrokitje të gjata e frenetike.                                        

Është synim i MFSK-së që Koncerti Festiv i Orkestrës Frymore të FSK-së për Festën e Vitit të Ri, të jetë tradicional.