Mitrovicë, 19 dhjetor - Dy automjete private, në dy raste të ndara, janë djegur si rezultat i zjarrëvënjes së qëllimshme nga persona ende të panjohur, në veri të Mitrovicës.

”Rasti i parë i zjarrvënjes është raportuar të ketë ndodhur rreth orës 02:20, të mëngjesit të sotëm, në lagjen “Kodra e Minatorëve” në veri të Mitrovicës, ndërsa vetura tip “Peugeot 406”, ngjyrë e bardhë, me targa “KM”, është djegur tërësisht. Pronari i veturës, përndryshe pjesëtar i Policisë së Kosovës në stacionin veri të Mitrovicës, i përkatësisë etnike serbe, është intervistuar nga policia.

Rasti i dytë i zjarrvënjes në veturë, është regjistruar rreth orës 03:10min, në rrugën “Mbreti Petër”, në veri të Mitrovicës, ndërsa vetura tip “Hyundai IX-35” ngjyrë e zezë, me targa “KM”, ishte përfshirë në zjarr.

Dëme materiale janë shkaktuar në pjesën e parme të automjetit ndërsa zjarrfikësit kanë arritur që të shuajnë zjarrin.

Nuk është raportuar për të lënduar në njerëz ndërsa vlera e dëmeve materiale të shkaktuara në të dyja rastet nuk është përcaktuar.

Njësitë policore të cilat kanë reaguar në vend ngjarje ende nuk kanë arritur të konstatojnë mënyrën e kryerjes së akteve kriminale të zjarrvënjes.

Hetuesit policor dhe teknikët e kriminalistikës të cilët kanë bërë këqyrjen e vendit të ngjarjes në kërkim të provave materiale, nuk kanë arritur që të gjejnë material të dyshuar për të përcaktuar shkaktarin e zjarrit.

Lidhur me zhvillimin e hetimeve të mëtejme, hetuesit policor janë në pritje të raportit nga ekspertët për përcaktimin e shkaktarit të zjarrit.

Policia e Kosovës ka regjistruar rastet si vepër të dyshuar penale “shkaktim i rrezikut të përgjithshëm”, njofton policia.