Prishtinë, 2 qershor - Me qëllim të koordinimit sa më të mirë për përmbushjen e aktiviteteve që dalin nga Plani i Veprimit të Strategjisë për Sigurinë Kibernetike,  zëvendësministri i MPB-së, njëherit Koordinator Nacional për Siguri Kibernetike, z. Nehat Mustafa vizitoi FSK, ku është pritur nga Gjeneral Rrahman Rama.

Gjatë këtij takimi, u diskutua gjendja e sigurisë kibernetike në shkallë vendi, si dhe hapat e mëtutjeshëm që duhet ndërmarrë në këtë drejtim.

“Siguria kibernetike është faktor shumë i rëndësishëm në fushën e sigurisë kombëtare. Tanimë si shtet kemi të miratuar edhe Strategjinë Kombëtare të Sigurisë, një dokument shumë të avancuar, i cili përcakton në mënyrë të detajuar orientimet tona se kah duhet të lëvizim. Themelimi dhe funksionalizimi i  CERT-ave në nivel vendi mbetet një nga objektivat kryesorë, ndërsa në këtë drejtim jemi shumë të kënaqur me aktivitetet e zhvilluara nga FSK”, theksoi zëvendësministri Mustafa.

Ndërsa Gjeneral Rraman Rama, vlerësoi lartë punën që është duke u bërë në fushën e sigurisë kibernetike dhe falënderoi zëvendësministrin Mustafa për angazhimin në avancimin e sigurisë kibernetike.

“FSK është shumë e përkushtuar dhe profesionale në përmbushjen e të gjitha objektivave të parapara me strategjitë shtetërore. Kemi investuar dhe po investojmë vazhdimisht në ngritjen e kapaciteteve të brendshme që kanë të bëjnë edhe me sigurinë kibernetike, ku vlen të theksohet ndihma e ofruar nga partneriteti që kemi me IOVA–n. Mbetemi të hapur për bashkëpunim me të gjitha institucionet shtetërore, e veçanërisht me institucionet e sigurisë”, theksoi gjeneral Rama.