Prishtinë, 23 maj - Ministria e Punëve të Brendshme (MPB) dënon ashpër incidentin e ndodhur në fshatin Dresnik të Komunës së Klinës, me ç’rast janë djegur dy shtëpi, pronë e dy familjeve të komunitetit serb.

Rasti është kualifikuar si: “Shkaktim i rrezikut të përgjithshëm- Zjarrvënie” dhe është duke u hetuar nga Hetimet Rajonale të Pejës, Njësitet e Forenzikës dhe Njësiti K9.

Ministria e Punëve të Brendshme fton qytetarët të bashkëpunojnë me Policinë e Kosovës në ndriçimin e këtij rasti dhe vënien para organeve të drejtësisë, personat e përfshirë në këtë akt kriminal.

Ministria e Punëve të Brendshme siguron të gjithë qytetarët e vendit se, sot jemi më të vendosur se kurrë për të mbrojtur jetën dhe pronën e të gjithë qytetareve pa dallim dhe nuk do të lejojmë që akte të tilla kriminale të dëmtojnë përpjekjet e Institucioneve të Republikës së Kosovës, për të ndërtuar një shoqëri tolerante bazuar në respektimin e të drejtave të njeriut pa dallim etnie, besimi apo bindje politike.

Liria e lëvizjes dhe e drejta e shfrytëzimit të pronës për të gjithë qytetarët e vendit është e garantuar me Kushtetutën e Republikës së Kosovës dhe si e tillë mbetet e pacenueshme, prandaj çdo veprim kriminal që është në kundërshtim me këtë frymë do të ballafaqohet me forcën e ligjit.