Prishtinë, 13 gusht - Komandanti i KFOR-it, Gjeneral Major Guglielmo Luigi Miglietta u takua sot në mëngjes, në Kampin “Film City”, Shtabi i përgjithshëm i NATO KFOR-it, në Prishtinë, me ambasadoren e Francës, Shkëlqesinë e saj, Maryse Daviet.

Gjenerali Miglietta dhe ambasadorja Daviet diskutuan për situatën e përgjithshme në Kosovë, duke u përqendëruar në zhvillimet e brendshme të fundit. 

Ata theksuan rolin e efektshëm të KFOR-it në ruajtjen e një ambienti të qetë dhe të sigurt dhe lirisë së lëvizjes për zhvillimin e kushteve më të mira sociale dhe ekonomike.

Ambasadorja e Francës, së bashku me ambasadorin amerikan, britanez, gjerman dhe italian janë pjesë e “ambasadorëve të Kuintit (Quint-it)”.

Pasdite, gjenerali Miglietta pranoi ambasadoren e Turqisë për Kosovën, Shkëlqesinë e saj, znj. Songul Ozan. Gjatë takimit, gjenerali Miglietta theksoi rolin e rëndësishëm, profesionalizmin dhe kontributin e jashtëzakonshëm të pjesëtarëve turkë në KFOR.  Ambasadorja Ozan konfirmoi që për njerëzit në Kosovë, KFOR-i është një nga institucionet më të besueshme.

Aktualisht, Turqia është një nga Kombet Kontribuese më të rëndësishme të KFOR-it, me më shumë se 380 ushtarë. Njëkohësisht, Turqia është kombi udhëheqës i Detashmentit të Përbashkët Rajonal – Jug.

Ambasadorja  Daviet dhe ambasadorja Ozan falënderuan Gjeneralin Miglietta për emërimin e tij prestigjioz si Komandanti i 20 i KFOR-it.