Riga, 6 nëntor - Ministri i Ministrisë për Forcën e Sigurisë të Kosovës, Agim Çeku së bashku me komandantin e FSK-së, gjenerallejtënant Kadri Kastratin dhe sekretarin e përgjithshëm, Shkëlzen Sylaj, me ftesë të Ministrisë së Mbrojtjes të Letonisë, po qëndrojnë për një vizitë zyrtare  në Republikën e Letonisë.

Delegacioni i Ministrisë për Forcën e Sigurisë të Kosovës  u prit në Riga nga ministri i Mbrojtjes së Letonisë, z. Raimonds Vejonis dhe stafi i lartë kësaj ministrie.

Ministria për Forcën e Sigurisë të Kosovës dhe Ministria e Mbrojtjes të Letonisë kanë marrëveshje bashkëpunimi, dhe kjo vizitë po zhvillohet me qëllim të thellimit të këtij bashkëpunimi.   

Ministri i Letonisë i konfirmoi ministrit Çeku gatishmërinë e tij për mbështetjen në zhvillimin e Forcës së Sigurisë të Kosovës, si dhe vazhdimin e bashkëpunimit dypalësh në mes dy ministrive.
Ministri i FSK-së, Agim Çeku, me këtë rast, falënderoi ministrin e Mbrojtjes si dhe Qeverinë e Letonisë për mbështetjen e pakursyer për zhvillimin e Ministrisë për Forcën e Sigurisë së Kosovës,  që është thelbësore për Kosovën.

Ministri i Mbrojtjes së Letonisë, Raimonds Vejonis, gjatë takimit, i  premtoi ministrit Çeku    ndihmën dhe mbështetjen e tij për FSK-në dhe Kosovën në integrimet evropiane dhe euro-atlantike.”Letonia i mbështet aspiratat euro-atlantike të Kosovës dhe është e gatshme të ndajë me të përvojën e saj në lidhje me procesin e integrimit në NATO.

\"Unë jam shumë i kënaqur me  bashkëpunim e mirë në mes të Letonisë dhe MFSK-së. Letonia është gjithashtu e gatshme ta ndihmoi  Kosovën në zhvillimin e forcave të saj të armatosura në të ardhmën”.

Ndërsa, ministri i MFSK-së, z.  Agim Ceku, u shpreh falënderues për ndihmën e Letonisë.
Unë jam shumë mirënjohës për ndihmën e vazhdueshme të Letonisë për  Kosovën, aq më tepër jam mirënjohës dhe e vlerësoj faktin se Letonia është  njëra  ndër vendet e para që ka njohur pavarësinë e Kosovës.

Ne  i jemi mirënjohës edhe Ministrisë së Mbrojtjes të Letonisë e cila ka kontribuar dhe po vazhdon të kontribuojë me angazhimin e ekspertëve të saj profesional në Ekipin Këshillues të NATO-s.

Ministri Çeku e informoi homologun e tij edhe për planet e Kosovës, për ngritjen e  forcave të saj të  armatosura, dhe theksoi se Kosova dëshiron t’i bëjë këto zhvillime me mbështetjen e NATO-s.

 Delegacioni i MFSK-së,  më pas, vazhdoi  vizitën  e tij në  Shtabin e Përgjithshëm të Forcave të Armatosura Kombëtare të Letonisë dhe në Bazën Ushtarake në Adazhi.