Mitrovicë, 15 prill - Forca e Sigurisë së Kosovës (FSK), të hënën me një ceremoni dinjitoze i dha lamtumirën e fundit  pjesëtarit të FSK-së, Kapiten Sherif Voca,  i cili ndërroi  jetë   pas një sëmundje të rëndë.                                           

Me rastin  e vdekjes së kapiten Sherif Vocës, gjatë ditës së djeshme  Batalioni i  Tretë  i Brigadës së Reagimit të Shpejtë  (BRSH-së), në Mitrovicë,  në të cilin i ndjeri kapiten Sherif Voca,  ishte Komandant Kompanie, në ambientet e kazermës “Minatori” kishte organizuar homazhe   në  nderim të tij, ku  kishin ardhur për t`u përshëndetur  për herë  të fundit shumë pjesëtarë të FSK-së, bashkëluftëtarë, miq dhe familjar.        

Me këtë rast homazhe kanë bërë edhe  Komandanti i FSK-së Gjenerallejtënant Kadri Kastrati, zëvendëskomandanti i Forcave Tokësore, Gjeneral brigade, Gëzim Hazrolli, komandanti i Brigadës së Reagimit të Shpejt (BRSH-së) Gjeneral brigade, Nazmi  Brahimaj, stafi i lartë i MFSK dhe FSK-së,  komandanti  i Batalionit të Tretë nënkolonel Arsim Shaqiri si dhe ushtarët e batalionit të Tretë  të BRSH-së.                                                                                                                     

Në ceremoninë e varrimit e cila u mbajt në varrezat e fshatit të lindjes,  Liqej të Komunës së Vushtrrisë, në emër të FSK-së foli gjeneral brigade  Gëzim Hazrolli, i cili   në fjalën e tij  lamtumirëse për  Kapiten Sherif Voca tha:  “Ishte oficer  i devotshëm, i përkushtuar  dhe besnikë  në realizimin  e objektivit  tonë  drejtë bërjes së Forcës së Armatosur  të Kosovës. Ishte  kontribuues i Lirisë së Kosovës në të gjitha fazat  e zhvillimit  tonë, që nga  pjesëmarrja  e tij në Ushtrinë Çlirimtare të Kosovës (UÇK),  më pas dha kontributin e tij  në TMK, po ashtu  ishte shembull i mirë si oficer  i pa lodhur  në FSK”.                                                                                        

Një fjalë  rasti mbajti edhe përfaqësuesi i shoqatave  të dala nga lufta  e UÇK-së  Shasivar  Shala  i cili evokoi kujtime  për jetën dhe veprimtarin e Sherif Vocës, për aktivitetin  e tij gjatë luftës çlirimtare  të tij dhe të familjes nëpërgjithësi.          

 Të pranishmit i përshëndeti edhe vëllai i të ndjerit Kapiten Sherif Vocës, i cili theksoi  se  “Sherifi sa ishte i familjes ishte  edhe i juaji  prandaj  e vlerësojmë shumë  pranin tuaj  dhe  prezencën tuaj  qe sot jeni këtu me ne për të ndarë dhimbjen së bashku”.

Mbi varrin e Kapiten Sherif Vocës  u vendosën  kurora lulesh nga Stafi  i lartë  i MFSK-së, ushtarët dhe eprorët e FSK-së, shoqatat e dala nga lufta e UÇK-së, familjarë  miq e shokë.