Prishtinë, 10 tetor - Kryeministri i Kosovës, Hashim Thaçi, ka thënë se nga 21 tetori, qytetarët e Luginës së Preshevës do të mund të hyjnë në Kosovë pa pagesë të taksave për automjetet e tyre.

Thaçi i ka bërë këto komente në takimin e së mërkurës me përfaqësuesit e shqiptarëve të Preshevës, Medvegjës dhe Bujanocit.

“Nga 21 tetori i këtij viti do të hiqen plotësisht taksat për veturat që hyjnë në Kosovë apo dalin dhe këto obligime do t’i marrë Qeveria e Republikës së Kosovës”, ka thënë Thaçi.

Sipas komunikatës së Kryeministrisë, Thaçi ka theksuar përkushtimin tij dhe të qeverisë në mbështetje të afirmimit të të drejtave kombëtare të shqiptarëve të Luginës.