Lirohen dy Policët e Kosovës të rrëmbyer nga forcat serbe
Lidhur me rastin e rrëmbimit të dy zyrtarëve policorë nga xhandarmeria serbe të ndodhur me datë 31 mars në fshatin Dumnicë të Komunës së Podujevës, Policia e Kosovës së bashku me institucionet vendore vazhdimisht ka bërë përpjekje të pandërprera duke shfrytëzuar të gjithë mekanizmat vendorë dhe ndërkombëtare për të bërë trysni për lirimin e tyre.
"Sot, dy zyrtaret policor të rrëmbyer janë liruar dhe të njëjtit nën përcjelljen e zyrtarëve policor të komponentës së EULEX-it, pas orës 13:00 janë kthyer në Kosovë dhe gjendja e tyre shëndetësore është e mirë", thuhet në njoftimin e policisë së Kosovës.
Lajmi është konfirmuar edhe nga Ministri i Punëve të Brendshëm të Kosovës, Bajram Rexhepi.
Edhe më herët ishte njoftuar se një gjykatë në Serbi kishte vendosur lirimin e dy policëve të arrestuar 48 orë më parë në Merdarë, në kufirin me Serbinë.
Rexhepi ka thënë se policët janë liruar pas ndërhyrjes së BE dhe shefi të misionit EULEX-it, Ksavjer De Marnak.
Edhe zëdhënësi i EULEX-it, Nikollas Hauton ka konfirmuar se tashmë policët kanë arritur në Kosovë.
"Hetimet për rrethanat e arrestimit të dy policëve të Kosovës do të vazhdojnë, por raporti final ka pakë gjasa të bëhet publik", ka deklaruar zëdhënësi i EULEX-it, Nikollas Hauton.
Ai nuk ka dhënë as ndonjë afat kohor se kur mund të jetë gati raporti në fjalë.
Shukri Binaku dhe Sami Beqiri u arrestuan të shtunën në mëngjes, teksa po patrullonin në fshatin Dumnicë të komunës së Podujevës. Ngjarja u paraqit me shumë bujë në Serbi ndërsa hasi në reagimin e ashpër të Prishtinës zyrtare, por jo vetëm.
Të hënën, skadonte edhe masa e ndalimit prej 48 orëve që policia e Serbisë kishte vendosur ndaj dy policëve kosovarë, ndërsa EULEX-i dhe KFOR-i kishin konfirmuar hetimin e çështjes.
Ndalimi i policëve të patrullës kufitare, Sami Beqiri dhe Shukri Binaku përbën incidentin më të rëndë ndërkufitar deri më tani, që kur KFOR-i ka filluar të transferojë përgjegjësitë për vijën e gjelbër pesë-kilometërshe tek autoritetet vendore.
