Prishtinë, më 31 mars - Kryesia e Kuvendit të Republikës së Kosovës , në mbledhjen e saj të drejtuar nga dr. Jakup Krasniqi, kryetar i Kuvendit, në të cilën merrnin pjesë  edhe shefat e grupeve parlamentare,  ka vendosur që  Kuvendi të mblidhet  të enjten, më  3 prill.

Fillimisht do të vazhdohet me pikat e papërfunduara nga seanca  e 27 marsit: votimi i katër raporteve të shqyrtuara , si dhe shqyrtimi  për herë të parë i Projektligjit për Zgjedhjet e Përgjithshme në Republikën e Kosovës.

Në mënyrë që Kuvendi t’i kryejë me sukses dhe përgjegjësi detyrat, si legjislativ i vendit, kryeparlamentari Krasniqi ka kërkuar nga anëtarët e Kryesisë dhe shefat e gupeve parlamentare të ndikojnë tek  deputetët që të jenë më të rregullt në mbledhjet e Kuvendit.

Anëtari i Kryesisë, Petar Miletiq, ndërkaq, ka përcjellë qëndrimin e deputetëve serbë që  Projektligjit për Zgjedhjet të tërhiqet nga seanca, për derisa të sqarohet çështja e vendeve të rezervuara për  komunitetet joshqiptare. Kreu i Kuvendit, Krasniqi, por edhe pjesëmarrësit e tjerë në diskutim, në këtë temë, kanë theksuar se çështjen e vendeve të rezervuara nuk  e rregullon ky projektligj, por Kushtetuta e vendit.

Në seancën e re, në të njëjtën ditë, do të shqyrtohet Projektligji  për Veteranët e Ushtrisë Çlirimtare të Kosovës. Në vazhdim do të shqyrtohet  Projektligji i për ratifikimin e Marrëveshjes së Garancisë për linjën kreditore për Fondin e Sigurimeve të Depozitave në Kosovë nëpërmjet Qeverisë së  Republikës së Kosovës dhe Bankës Evropiane për Rindërtim dhe Zhvillim, si dhe Projektligji për produkte dhe pajisje medicinave.

Si rëndom, në këtë seancë të rregullt të Kuvendit,  deputetët do të kenë rastin të bëjnë deklarime jashtë rendit të ditës dhe  të shtrojnë pyetje parlamentare për punën e Qeverisë së Kosovës.

Kërkesën  për procedimin e Projektligjit për ndryshimin dhe plotësimin e  Ligjit nr. 04/L-156 për kontrollin e duhanit, Kryesia ia ka deleguar Komisionit (funksional) të Shëndetësisë.

Duke e shqyrtuar, ndërkaq Rekomandimin e  Komisionit për Zhvillim Ekonomik, Infrastrukturë, Tregti dhe Industri lidhur me funksionimin e  Agjencive dhe Rregullatorëve të Pavarur që i raportojnë Kuvendit të Republikës së Kosovës, Kryesia ka mbajtur qëndrim që para se ato të radhiten për seancë plenare të Kuvendit, duhet të shqyrtohen nëpër komisionet e tjera parlamentare.

Pasi e ka marrë njoftimin e Komisionit për Zhvillim Ekonomik, Infrastrukturë, Tregti dhe Industri lidhur me procedimin e Vendimit të Qeverisë së Kosovës për emërimin e kryesuesit dhe të  anëtarëve të Komisionit për Mbrojtjen e Konkurrencës, Kryesia  ka kërkuar nga komisioni në fjalë që ta rishqyrtojë çështjen, konform  rregullave në fuqi.