Prishtinë, 20 qershor - Me një minutë heshtje ka filluar mbledhja e Qeverisë së Kosovës, në shenjë nderimi për vdekjen e kryetarit të Bordit të AKP-së, Dino Asanaj.

Me këtë rast kryeministri i vendit, Hashim Thaçi ka kërkuar nga të gjitha institucionet që të investigojnë shkaqet e vdekjes së Asanajt duke shtuar se do të shqyrtohet çdo rrethanë, faktor apo shantazh për vdekjen e tij.

Ai, në emër të Qeverisë së Kosovës dhe në emrin e tij i ka shprehur ngushëllime familjes, bashkëpunëtoreve dhe gjithë miqve të Dino Asanaj. Për më tepër, ai ka shtuar se vdekja e tij ishte një lajm tronditës për të gjithë, si për familjen, bashkëpunëtorët dhe gjithë qytetarët e Kosovës.

Thaçi ka kërkuar zbardhjen e çdo rrethane apo, siç ka thënë ai, shantazhi që qoi në vdekjen e Asanajt.

“Duhet të siguroj gjitha institucionet e Kosovës se do të bëjmë çdo angazhim që rrethanat e vdekjes së Asanajt, shkaqet e vdekjes së këtij zyrtari të lartë të shtetit të sqarohen plotësisht.\"

\"Do të shqyrtojmë çdo rrethanë, faktor dhe shtytje që ndikojnë në vdekjen e dhunshme të Asanajt, qoftë të veprimeve subjektive apo objektive, të shantazheve të bëra edhe publik, nga individ apo grupe kriminale dhe mafioze të cilët nuk e pranojnë ekonominë e lirë të tregut të lirë.\"

\"Ne në Kosovë në shtetin tonë të ri nuk do të lejojmë me asnjë çmim që shantazhi, kërcënimi dhe dhuna të bllokoj ekonominë e lirë të tregut dhe konkurrencën”, ka thënë kryeministri Thaçi.

Për më tepër, ai ka shtuar se Asanaj ka punuar shumë për vendin në kohën e çlirimit, në kohën e përpjekjeve për liri, e shtetbërje dhe për të do të respektohet gjithmonë nga shteti dhe qytetarët e vet të Kosovës.