Komuna mobilizon të gjitha kapacitetet për të zhbllokuar rrugët
Mitrovicë, 13 shkurt - Komuna e Mitrovicës ka mobilizuar të gjitha potencialet për tu përballur me kushtet e rënda klimatike dhe borën e madhe që ka krijuar vështirësi për qarkullim të qytetarëve, sidomos në zonën e Shalës. Në këtë kuadër janë ndërmarrë një sërë vendimesh dhe masash konkrete, në mënyrë që situata të menaxhohet me sukses.
Kryetari i Komunës, Avni Kastrati, tha të hënën në takimin e Komitetit për Mbrojtje nga Fatkeqësitë Natyrore dhe Fatkeqësitë Tjera, se duhet të aktivizohet i gjithë potenciali komunal, duke përfshirë ndërmarrjet publike, ato private dhe vetë qytetarët për tejkalimin e kësaj situate. U vendos që të krijohen edhe gjashtë grupe të përbashkëta me zyrtarë komunalë dhe pronarë të kompanive që janë angazhuar për pastrimin e borës për të përcjellur nga afër punën në terren.
Kryetari Kastrati, tha se këto grupe do të raportojnë përditë për gjendjen në rrugë dhe për ecurinë e pastrimit të tyre nga bora. Kjo është një mënyrë e mirë për të rritur përgjegjësinë dhe për të ndikuar në rritjen e efikasitetit.
Në këtë takim u morën edhe një sërë vendimesh që kanë të bëjnë me mobilizimin për tu përballur me problemet e krijuara nga bora dhe kushtet e rënda klimatike. Pos kapaciteteve komunale, ndërmarrjeve publike, policinë, KEK-un, Ujësjellësin rajonal etj, përballë sfidës që ka krijuar moti do të organizohen edhe kompanitë private, pronarët e dyqaneve dhe vetë qytetarët.
Në anën tjetër, duke pasur parasysh se shumë fshatra të thella malore, sidomos në zonën e Shalës kanë mbetur të bllokuar nga bora, Komuna e Mitrovicës, do të marrë në shfrytëzim një motoski nga qendra e skijimit në Bajgorë, e cila do të mundësoj që të mbahet kontakti me zonat e bllokuara. Gjithashtu me anën e kësaj pajisje do të dërgohen edhe ndihma ushqimore në familjet që kanë nevojë.
Drejtoria e Inspekcionit, mori përsipër që të punoj për largimin e automjeteve të parkuara në anën e djathtë të rrugëve të qytetit, të cilat janë duke penguar pastrimin e rrugëve. Drejtori i kësaj drejtorie, Lulzim Zeqiri, njoftoi se prej të martës e deri në normalizimin e situatës, nuk do të lejohet parkimi i automjeteve në rrugët kryesore të qytetit, prej orës 18:00 të mbrëmjes deri në orën 07:00 të mëngjesit. Ai kërkoi nga qytetarët që të respektojnë këtë vendim në mënyrë që të lehtësohet pastrimi i rrugëve.
Drejtori i Inspekcionit, poashtu tha se pronarët e subjekteve dhe pronarët e shtëpive pranë rrugëve janë të obliguar që të pastrojnë trotuaret para dyqaneve dhe shtëpive. I kemi njoftuar dhe jemi duke punuar në terren që bashkërisht të kontribuojmë për lehtësimin e qarkullimit për automjete dhe këmbësorë.
Në këtë takim të Komitetit për Mbrojtje nga Fatkeqësitë Natyrore dhe Fatkeqësitë Tjera, i cili është aktivizuar para një jave në kuadër të masave të gatishmërisë për tu përballur me problemet si pasojë e kushteve klimatike, u vendos që resorët përgjegjës të komunës të përgatisin një plan për parandalimin e vërshimeve të mundshme pasi të filloj shkrirja e borës. U tha se do të intervenohet për pastrimin e shtretërve të lumenjve që kalojnë përmes qytetit, si shtrati i lumit Lushtë dhe ai i lumit Trepça.
Kryetari Kastrati, kërkoi nga KEK-u mos të ketë reduktime të energjisë në këtë kohë, meqë është duke sjell probleme të mëdha për qytetarët, por edhe për ndërmarrjet si Ujësjellësi rajonal etj. Gjithashtu nga Ministria e Infrastrukturës u kërkua që të marrë masa për mirëmbajtjen e magjistrales Mitrovicë-Podujevë.
Lidhur me gjendjen në terren, drejtori për Mbrojtje dhe Shpëtim, Behxhet Bala, tha se megjithë angazhimin e gjashtë kompanive shumë fshatra në zonën e Shalës janë të bllokuara. Tha se janë duke punuar vazhdimisht që sa më parë të gjitha rrugët të jenë të kalueshme.
Si problem të madh përmendi mospastrimin e rrugës magjistrale Mitrovicë-Podujevë që është në përgjegjësi të Ministrisë së Infrastrukturës, e cila është e kalueshme vetëm deri në Bajgorë. Në mungesë të intervenimit nga kompania e kontaktuar nga Ministria, ne po detyrohemi me kapacitetet tona që të punojmë edhe në atë rrugë.