Prishtinë, 15 prill - Komandanti i Forcës së Sigurisë së Kosovës, gjenerallejtnant Rrahman Rama i shoqëruar nga këshilltari i tij nga Britania e Madhe, nënkolonel David Jones dhe ndihmës atasheu ushtarak i Ambasadës Amerikane në Prishtinë, major Thomas Melton vizituan Komandën e Doktrinës dhe Stërvitjes.

Gjatë vizitës u takuan me komandantin e KDS gjeneral brigade Enver Cikaqi ku diskutuan për trajnimet të cilat janë duke u realizuar në Komandën e Doktrinës dhe Stërvitjes, si dhe vizituan rekrutët në Kursin Bazik.

Gjeneral Rama rekrutëve të kursit bazik ju drejtua duke bashkëbiseduar me ta, fillimisht duke i përgëzuar për përzgjedhjen e tyre që të jenë pjesë e FSK-së, mandej gjeneral Rama tha se” të jesh pjesë e FSK-së është nder për ju, por edhe krenari për familjet e juaja, sepse kjo është një nga mënyrat më të mira për ti shërbyer vendit’’. 

Ju e keni rastin ti kontribuoni vendit tuaj, unë jam njoftuar nga komandanti juaj se ju jeni duke treguar përkushtim të lartë, në përpjekjet tuaja për të arritur rezultate sa më të larta dhe kjo na bënë të mburremi me punën e instruktorëve, me përkushtimin tuaj dhe angazhimin e tërë stafit që kursi të përfundoj me sa më shumë sukses”.

KOMFSK bisedoi edhe me instruktorët me të cilët diskutoi për sfidat e mundshme, por edhe kërkoi nga ta që të vazhdojnë me përkushtimin e njëjtë deri në finalizimin e këtij programi.

Gjeneral Rama e pa nga afër demonstrimin e aftësive të rekrutëve në pjesën praktike të trajnimeve, pjesë e planit të stërvitjes në Komandën e Doktrinës dhe Stërvitjes, për të cilin tha se e gëzon fakti që rekrutët kanë arritur ta kuptojnë dhe ta demonstrojnë një plan taktik për një periudhë relativisht të shkurtër, e cila pa përkushtimin e rekrutëve dhe angazhimin e instruktorëve nuk do të ishte e mundur të ndodh.