Prishtinë, 14 maj - Këshilli për Mbrojtjen e të Drejtave dhe Lirive të Njeriut (KMDLNJ) ka deklaruar se nuk është hera e parë që Halit Barani, kryetar i KMDLNj – së, Qendra Rajonale në Mitrovicë pengohet gjatë ushtrimit të aktiviteteve në fushën e mbrojtjes së të drejtave të njeriut dhe ato kombëtare.

Më 11.05.2014 derisa ishte para shtëpisë së tij në lagjen “Ilirida” në Mitrovicë ishte fotografuar nga policë të EULEX – it që ishin me xhip të kaltër dhe me targa EU – 2226 duke e shkelur privatësinë e zotit Barani dhe duke shqetësuar atë dhe familjarët e tij. Halit Barani vazhdimisht ishte fotografuar nga policët e Serbisë në veri të Mitrovicës, strukturat paralele në veri dhe rojat e urës.

Në veçanti kryetari i KMDLNj – së Q.R në Mitrovicë ishte përcjellur më parë nga policia e UNMIK – ut (kontingjenti francez) dhe KFOR – i  francez.

Sidomos pas ngjarjeve tragjike të shkurtit të vitit 2000 kur u vranë dhe u mbytën 11 shqiptarë dhe boshnjakë dhe dhunshëm u shpërngulën nga Veriu i Mitrovicës afërsisht 13,000 shqiptarë dhe joserbë të cilët pastaj nuk u lejuan të kthehen në pronat e tyre në ndërkohë që banesat, shtëpitë dhe lokalet afariste u plaçkitën dhe u uzurpuan nga strukturat paralele të Serbisë dhe serbët e ardhur kryesisht nga Serbia.

Halit Barani dhe KMDLNj u penguan nga ndërkombëtarët sidomos gjatë ngjarjeve të marsit të vitit 2004 me ç’ rast, pas veprimeve të dhunshme u vranë 8 qytetarë serbë, 11 shqiptarë ndërsa në lumin Ibër të fshatit Çabër u mbytën (rrethanat nuk u hetuan kurrë) 3 fëmijë shqiptarë.

Gjatë këtyre ngjarjeve mijëra qytetarë serbë u detyruan t’i lëshojnë vendbanimet e tyre për shkak të pasigurisë dhe dhunës së ushtruar ndaj tyre.

Pas ngjarjeve të marsit të vitit 2004 hetimet për zbardhjen e këtyre ngjarjeve ishin të njëanshme duke u hetuar vetëm vrasja e serbëve ndërsa nuk u hetua as edhe një rast i vetëm kur u vranë (në dy raste u ekzekutuan) shqiptarët e sidomos u mbyllën në mënyrë ofenduese hetimet për mbytjen e tre fëmijëve shqiptarë në lumin Ibër të fshatit Çabër me arsyetim se: “nuk po mund të gjendet qeni që i sulmoi fëmijët të cilët pastaj, për shkak të frikës hyn në lumin Ibër dhe u mbytën”! Halit Baranit iu morën fotografitë dhe materialet e KMDLNj – së dhe për një kohë u arrestua nga KFOR – i francez.

Përcjellja e vazhdueshme dhe pengimi i Halit Baranit mbase bëhet për faktin se ai ofroi fakte dhe këmbënguli në qëndrimin se Oliver Ivanociq është përgjegjës për krime lufte dhe ekzekutimin e civilëve të pafajshëm shqiptarë gjatë luftës dhe dhunës së shkurtit të vitit 2000. Gjithashtu, Halit Barani si drejtues i KMDLNj – së, Q.R në Mitrovicë i organizoi disa ekspozita me fotot e viktimave të luftës së fundit, viktimave të dhunës së shkurtit të vitit 2000 si dhe listën e të dyshuarve për krime ndaj civilëve shqiptarë dhe atyre joserbë gjatë luftës 1998 – 1999 dhe ngjarjeve të vitit 2000 si dhe të vitit 2004.

KMDLNj vlerëson shumë punën e Halit Baranit në fushën e të drejtave të njeriut, të drejtave kombëtare dhe atyre politike dhe tërheq vërejtjen se që nga fillimi i aktivitetit të Halit Baranit (1989) e deri më sot, as policia e Serbisë e as ndërkombëtarët nuk kanë mundur ta përgënjeshtrojnë një informatë apo material tjetër të Halit Baranit dhe KMDLNj që nënkupton se dëshmitë e KMDLNj – së nuk mund të vihen në dyshim. Gjithashtu, KMDLNj i përkujton ndërkombëtarët se Halit Barani, si dëshmitar i KMDLNj – së (si dhe anëtarë të tjerë të KMDLNj –së) ka dëshmuar në procesin kundër Slobodan Milosheviqit para Tribunalit për Krime të Luftës në Hagë.

Prandaj, KMDLNj kërkon nga EULEX të mos e pengojë punën e kësaj organizate për mbrojtjen e të drejtave të njeriut që vepron në vazhdimësi nga 14 dhjetori 1989 – data e themelimit deri më sot por të ndërtojë raporte të bashkëpunimit dhe partneritetit në zbardhjen e krimeve gjatë dhe pas përfundimit të luftës pavarësisht përkatësisë nacionale të viktimave dhe atyre që dyshohen për kryerjen e krimeve.

KMDLNj përkujton opinionin se EULEX – i si pasardhëse e policisë së UNMIK – ut ka bashkëpunuar me Këshillin në shumë raste të krimeve të luftës prandaj nuk e kupton pse duhet të pengohet Halit Barani!