Prishtinë, 3 nëntor - Në hapësirat e Kazermës së Forcës së Sigurisë së Kosovës  “Evropianët e Rinj” në Regjimentin e Mbrojtjes  Civile  në Pomozotinë dhe  në Kampin  “Vrellë”  në Sllatinë, u realizua Ushtrimi Fushor  "Shpata e Argjent 2017-2", i cili u realizua nën udhëheqjen dhe komandimin  e KFOR-it, në  bashkëpunim me njësitë e   Forcës së Sigurisë së Kosovës (FSK), Policisë së  Kosovës (PK), EULEX-it  dhe Agjencinë  për Menaxhimin e Emergjencave (AME).

Për ta përcjellë nga afër ushtrimin që demonstruan këto institucione  të pranishëm ishin: Admirali  Murray Joe "JT" Tynch, nga Shtabi i Komandës së Forcave të Bashkuara në Napoli, Drejtori i Drejtorisë për Operacione në Ministrinë e Forcës së Sigurisë së Kosovës Gjeneral brigade Zymer Halimi, zëvendëskomandanti i Komandës së Forcave Tokësore Gjeneral  Brigade Gëzim Hazrolli, Komandanti i Doktrinës dhe Stërvitjes Gjeneral Brigade Enver Cikaqi, Shefi i Shtabit të KFT-së Kolonel Naim Haziri,  UD i komandantit të BRSH-së  Kolonel Xhevahir Geci, zëvëndëskomandanti i Batalionit për Mbeshtetje Operacionale (BMO) kolonel Avdi Rraci, Komandanti i  KFOR-it gjeneral Giovanni Fungo,  si dhe epror  të FSK-së, KFOR-it, EULEX-it, Policisë së Kosovës si dhe përfaqësues të Agjencisë për Menaxhimin e Emergjencave (EMA).

Të pranishmëve me një  fjalë rasti  ju  drejtua  gjeneral brigade Gëzim  Hazrolli, duke ju deshiruar mirëseardhje në kazermën e FSK-së, ai theksoi se KFOR-i është partneri më i rëndësishëm i cili po mbështetë  ngritjen profesionale  të FSK-së.

Ushtrimi ,,Silver Sabre 17-2” është një ushtrim kompleks  dhe mirë i organizuar. KFOR-i ka bërë një punë të mirë duke bashkuar të gjithë  në një ushtrim  të përbashkët  nga të gjitha institucionet, me që rast për organizimin e mirë  përgëzoj stafin planifikues dhe kolonelin  Rozenberg.

Me ushtrime të tilla po testohen kapacitetet operacionale dhe bashkëpunimi mes KFOR-it, FSK-së, Policisë së Kosovës dhe agjencive tjera.

Në bashkëpunimin dhe veprimin e përbashkët arritja më e madhe e  gjithë kësaj është ndërveprueshmëria në mes institucioneve, në planifikimin, përgatitjen dhe ekzekutimin e operacioneve, si dhe vlersimin e rreziqeve,  si hap në ngritjen e profesionalizimit në mënyrë sistematike.

Gjeneral Hazrolli në fund  theksoi se; jemi duke shikuar përpara në ngritjen e këtij bashkëpunimi  me KFOR-in dhe institucionet tjera, në organizimin e ushtrimeve dhe ngjarjeve  tjera.

I kënaqur me bashkëpunimin  gjatë realizimit të  këtij ushtrimi u shpreh edhe Komandanti i KFOR-it  Gjeneral Giovanni Fungo,  ushtrimet e përbashkëta janë një mundësi e mirë, për të bashkuar të gjithë akterët dhe organizatat relevante, të cilat janë përgjegjëse për ambientin e qetë dhe të sigurtë në Kosovë.

Ky ushtrim organizohet çdo gjashtë muaj  për të përmbushur misionin  që kemi të gjithë së bashku. Tash tri vite me këtë aktivitet  ne po kontrollojmë bashkëpunimin, ndërveprueshmërin e institucioneve  dhe i gjithë qëllimi  ynë është të ofrojmë siguri për qytetarët  në të gjithë Kosovën.

Ushtrimi fushor ,,Silver Sabre 2017-2” është  drejtuar  nga KFOR-i  me pjesëmarrjen e të gjitha institucioneve të sigurisë në vend.

Të pranishmit  në ceremoni,  fillimisht përcollën inskenimet në kampin e FSK-së në Pomozotin,  ku u demonstruan kapacitetet operacionale të Forcës së Sigurisë së Kosovës si në:  Materie të Rrezikshme (MKAB), Kërkim Shpëtim  Urban, Deminim dhe evakuim mjekësor.

Të gjithë  mysafirët e ftuar  kanë vazhduar me përcjelljen e aktiviteteve në kampin Vrellë, ku u demonstruan aktivitete të menaxhimit të turmave dhe shpëtimi i njerëzve të rrëmbyer. Në një kënd u prezantuan pajisjet e të gjitha njësive pjesëmarrëse në ushtrim.

Në fund të ceremonisë zëvëndëskomandanti i KFOR-it  gjeneral brigade Csombok i cili ishte edhe Drejtor i Ushtrimit, në shenjë mirënjohje për kontributin e tyre në realizimin me sukses  të këtij ushtrimi, ndau mirënjohje për të gjithë udhëheqësit e ekipeve pjesëmarrëse në ushtrim.