Prishtinë, 20 qershor - Me rastin e ditës botërore të refugjatëve, UNHCR, agjencia e OKB-së për refugjatët, theksoi se aktualisht në botë ka më shumë refugjatë dhe të zhvendosur, se kurdoherë më parë. Numri i refugjatëve, i azil kërkuesve, dhe i personave të zhvendosur brenda vendit ka kaluar 65.6 milion njerëz.

Raporti i ri i UNHCR-së Trendet Globale vë në pah se janë 65.6 milion njerëz të zhvendosur me forcë në fund të vitit 2016, rreth 300 mijë më shumë se në vitin e kaluar. Në këtë numër përfshihen 22.5 milion refugjatë, numri më i lartë deri më tani; 2.8 milion veta kanë bërë kërkesë për azil; kurse 40.3 milion janë persona të zhvendosur brenda vendit. Rritja e numrit të refugjatëve ka ndodhur më së shumti për shkak të luftës në Siri prej nga janë larguar 5.5 milion veta. 

“Ky është një numër i madh dhe i pa pranueshëm i të zhvendosurve dhe me zë më të lartë se kurdoherë flet për nevojën për solidarizim dhe qëllimit të përbashkët në parandalimin dhe zgjidhjen e krizave. Kjo, po ashtu flet edhe për kërkesën që, ta bëjmë të sigurtë se refugjatët, personat e zhvendosur brenda vendit dhe azil kërkuesit kudo në botë të jenë të mbrojtur si duhet dhe që të kërkohen zgjidhje për ta,” tha Komisioneri i Lartë  i OKB-së për refugjatët Filippo Grandi. “Ne, duhet të bëjmë punë më të mirë për këta njerëz. Për botën në konflikt, ajo çfarë kërkohet është përkushtimi dhe kurajoja, e jo frika.”

Shefi i misionit të UNHCR-së në Kosovë, Narasimha Rao, me rastin e ditës botërore të refugjatëve, tha, se “ne kujtojmë gjendjen e vështirë të të gjithë atyre që ishin të shtrënguar të ikin për të shpëtuar jetën e tyre. Në Kosovë, ne, po punojmë së bashku me institucionet e Kosovës, shoqërinë civile dhe me të tjerë për të siguruar se të zhvendosurit që duan të kthehen në shtëpitë e tyre të mund ta bëjnë këtë me dinjitet dhe në gjendje sigurie të duhur”.

Shefi i misionit të UNHCR-së në Kosovë, Narasimha Rao, theksoi se “mbështetja e kthimit vullnetar e të zhvendosurve është përgjegjësi e të gjitha institucioneve të Kosovës”.

UNHCR vlerëson se janë mbi 16,000 persona të zhvendosur brenda në Kosovë. Po ashtu mbi 800 persona janë të zhvendosur në Malin e Zi dhe afro 600 në IRJ të Maqedonisë, të cilët janë duke pritur zgjidhje të qëndrueshme. UNHCR vlerëson se rreth 90,000 persona të zhvendosur në Serbi mbeten pa zgjidhje të qëndrueshme.